ԱՄՆ շրջանային դատարանը ուրբաթ օրը որոշում է ընդունել հօգուտ Գլենդելի ոստիկանության և վերջինիս երկու աշխատակիցների: Նրանք մեղադրվում էին 72-ամյա տղամարդու հայցի հիման վրա, ով հայտարարել էր, թե ոստիկանության աշխատակիցներն իրեն ձերբակալելիս անհարկի ուժ են գործադրել ու կոտրել իր ձեռքը:
Դատավճիռը կայացվել է երեք օր տևած դատալսումներից հետո:
«Օրենքը և կարգը պահպանելը դժվար աշխատանք է, առայժմ մենք այն անում ենք ինչպես հարկն է և պրոֆեսիոնալ կերպով»,- էլեկտրոնային նամակում ասել է տեղի ոստիկանապետ Կարլ Պովիլաիտիսը:- «Մենք գոհ ենք, որ դատարանը գտել է, որ ոստիկանները խախտում չեն արել»:
Միրզաեյանը պնդել էր, որ ոստիկանները 2010-ի մայիսի 9-ին իրեն ձերբակալելիս ջարդել են իր աջ ձեռքը: Նա խոստովանել է, որ այդ օրը նշանակված դեղեր և ալկոհոլ է օգտագործել:
Դատական փաստաթղթերի համաձայն` նրան հասարակության մեջ հարբած երևալու և ոստիկանությանը դիմադրելու մեղադրանք է առաջադրվել:
Դատավարության ընթացքում Միրզաեյանը դժվարությամբ է հիշել պատահարի և իր բուժման մանրամասները:
Հսկող տեսախցիկների նկարահանումները դիտվել են դատավարության առաջին օրը: Դրանցում երևացել է, որ Միրզաեյանն ինքն է մոտեցել ու սկսել խոսել ոստիկանների հետ:
