Եվրոպայի խորհրդի խորհրդարանական վեհաժողովի մոնիթորինգային հանձնաժողովում մի քանի օր առաջ քննարկվել էր Սաֆարովի արտահանձնման և Ադրբեջանի հարցը: ԵԽԽՎ-ոմ Հայաստանի պատվիրակության ղեկավար, Աժ ՀՀԿ խմբակցության անդամ, պետական-իրավական հանձնաժողովի նախագահ Դավիթ Հարությունյանն Aravot.am-ին խոստացել էր Երևան վերադառնալուց հետո մանրամասներ ներկայացնել:
Երեկ «Առավոտ»-ի հետ զրույցում Հարությունյանը նշեց. «ԵԽԽՎ մոնիթորինգի հանձնաժողովի նիստերը քանի որ դռնփակ են, որպես կանոն, էթիկան պահանջում է մանրամասներ չներկայացնել նիստից: Միայն կարող եմ ասեղ, որ մենք երկուսով` ես և Արմեն Ռուստամյանը, ելույթ ենք ունեցել: Ելույթը եղել է ոչ միայն Սաֆարովի դեպքի հետ կապված, այև Ադրբեջանի նախնական զեկույցի հետ կապված, որը նախապատրաստվել էր Ադրբեջանի զեկուցողների կողմից: Մենք բավականին լուրջ քննադատության ենք ենթարկել այդ զեկույցը: Շատ քիչ արձագանքներ եղան, և հենց դրանով էր պայմանավորված իմ հայտարարությունը, որ Եվրոպայի խորհրդի խորհրդարանական վեհաժողովը գահավիժում է: Հետագայում իրավական հարցերի հանձնաժողովում շատ ավելի լուրջ քննարկում է եղել հատկապես Սաֆարովի գործի հետ կապված»:
