Օգոստոսի սկզբից Մարսի հարավային կիսագնդի Գեյլ խառնարանում աշխատող Curiosity մարսագնացը սկսել է իր երկումետրանոց մանիպուլյատորի և իր վրա տեղադրված գիտական սարքերի ստուգումը, հայտնում է NASA-ի Ռեակտիվ շարժման լաբորատորիան:
Մարսագնացը 2,1 մ երկարությամբ «ձեռք» ունի, որի ծայրին տեղադրված է գիտական սարքերի մի համակարգ:
NASA-ի մասնագետները մանիպուլյատորն առաջին անգամ գործարկել են չորեքշաբթի: Սպասվում է, որ ստուգումներն ու փորձարկումները կտևեն 10 օր:
Վայրէջքի պահից ի վեր մարսագնացը Կարմիր մոլորակի վրա արդեն 109 մ տարածություն է անցել:
2,5 մլրդ դոլար ընդհանուր արժեքով «Մարսի գիտական ծրագիր» (Mars Science Laboratory) նախագիծը սկսվել է 2004-ին: Դրա գլխավոր օղակը Curiosity մարսագնացն է` մարսագնացների արդեն երրորդ սերնդի ներկայացուցիչը:
