Новости-Грузия-ի փոխանցմամբ՝ Թբիլիսիի քաղաքապետարանը կանոններ է սահմանել մայրաքաղաքում շներ ու կատուներ պահելու վերաբերյալ: Ըստ այդ կանոնների՝ կենդանու տերը պետք է խնամի կենդանուն՝ նրա կոնկրետ տեսակին համապատասխան ձևով՝ հաշվի առնելով նրա կենսաբանական առանձնահատկությունները, ինչպես նաև ապահովի համապատասխան սնունդ, ֆիզիկական ակտիվություն, ջերմացվող ննջավայր և կենդանու արտաթորանքի համար համապատասխան պայմաններ:
Բացի այդ, կենդանու տերը պարտավոր է նախազգուշական գրություն փակցնել այն տարածքում, որտեղ շներն ազատ են արձակված: Անթույլատրելի է համարվում կենդանուն փողոց նետելը: Եթե կենդանու տերն այլևս չի ցանկանում պահել նրան, ապա նա կենդանուն կարող է հանձնել քաղաքապետարանի համապատասխան ծառայությանը:
Թբիլիսիում արգելվել է կենդանիների մասնակցությամբ մարտեր անցկացնելը: Կենդանիների տերերին արգելվել է իրենց կենդանիների հետ հայտնվել հանրային սննդի վայրերում, դեղատներում ու խանութներում՝ բացառությամբ հատուկ մասնագիտացվածների:
Բացի այդ, կենդանիների տերերին պարտադրվել է կենդանու վրա ամրացնել միկրոչիպ կամ հատուկ վզկապ, որում նշված կլինի նրա տիրոջ անունը, ազգանունը, հասցեն և հեռախոսի համարը: Հասարակական վայրերում շների զբոսանքը, բացառությամբ դեկորատիվ շներից, հնարավոր է միայն կապված վիճակում և դնչկալով: Այս կանոնը տարածվում է նաև Թբիլիսիի հասարակական տրանսպորտից օգտվելու դեպքում:
Կանոններով կենդանիների տերերին պարտավորեցվել է իրենց կենդանիների զբոսանքից հետո հավաքել նրանց կեղտը: Շների տերերը պարտավոր են բժշկական-անասնաբուժական հիմնարկին տեղյակ պահել, եթե իրենց շունը կծել է մարդու կամ շան և վճարել այդ հիմնարկի ծառայությունների դիմաց:
Տարեկան մեկ անգամ էլ անհրաժեշտ է կենդանուն տանել անասնաբույժի մոտ, իսկ կենդանու սատկելու դեպքում՝ այդ մասին տեղյակ պահել անասնաբուժական կլինիկային և քաղաքապետարանի համապատասխան ծառայությանը: Թբիլիսիի տարածքում միայն հատուկ սահմանված վայրերում է թույլատրված տնային կենդանիների հուղարկավորությունը:
Կենդանուն կյանքից զրկել կարելի է միայն անասնաբույժի որոշման հիման վրա, եթե կենդանին ունի վտանգավոր հիվանդություն, կամ էլ եթե դա վերաբերում է անտուն կենդանիներին՝ նրանց ավելորդ տանջանքներից փրկելու համար: Կենդանուն կյանքից զրկել թույլատրվում է միայն հատուկ դեղորայքի միջոցով:
