Այս շաբաթ Հյուսիսային Կարոլինա նահանգի Շարլոտ քաղաքում անցկացված Դեմոկրատական կուսակցության համագումարին առաջին անգամ մասնակցած հայազգի Ջուլիետ Մինասյանը, որը հ Գլենդելի բնակիչ է, եղել է համագումարում Կալիֆոռնիայի պատվիրակության միակ ամերիկահայ ներկայացուցիչը: Այս մասին հաղորդում է Glendale News Press-ը:
50-ամյա Մինասյանն ինքնազբաղ հաշվապահ է, հանդիսանում է Գլենդելի դեմոկրատական ակումբի փոխտնօրեն: Նա Գլենդել է գնացել Իրանից, 15 տարի առաջ:
«Համագումարին մասնակցած Կալիֆոռնիայի պատվիրակության կազմում ես միակ ամերիկահայն էի: Հուսով եմ, հաջորդ անգամ կկարողանամ ամերիկահայերի ներգրավել: Նրանք ակտիվ չեն: Կարծում եմ դա գալիս է մշակույթից: Ինձ համար, որպես կին շատ դժվար էր ներգրավվել քաղաքականության մեջ, հատկապես, որ քրիստոնյա եմ»,- ասել է նա:
Համագումարի ժամանակ նրա գլխին եղել է Օբամային պատկերող հսկա կոճակներով գլխարկ, իսկ ձեռքում նա պահել է « Armenian American 4 Obama» գրությամբ պաստառը:
Միասյանը հույս ուներ հավաքվածների ուշադրությունը հրավիրել սիրիահայ և իրաքահայ փախստականների խնդիրների վրա, սակայն հանգամանքներից ելնելով` այդ մասին որոշել է խոսել մեկ ուրիշ անգամ:
