ИТАР-ТАСС-ի փոխանցմամբ՝ Էգեյան ծովում՝ Իզմիրի ափերի մոտ, այսօր խորտակված նավի զոհերի թիվը հասել է 58-ի: Այս մասին հայտարարել է Իզմիրի փոխնահանգապետ Արդահան Թոթուքը:
Նշվում է, որ ընդհանուր առմամբ այդ 15 մետրանոց նավում գտնվել է մոտ 100 ապօրինի ներգաղթյալ: Միջադեպից հետո փրկարարներին հաջողվել է ջրից դուրս բերել նրանցից 45-ին, այդ թվում նաև` 1 կնոջ ու 2 երեխայի: Նավի ուղևորները պատմել են, որ արշավի կազմակերպիչները խոստացել են իրենց բարեհաջող հասցնել Մեծ Բրիտանիա:
Դա կազմակերպել են Թուրքիայի երկու քաղաքացիներ, որոնք տեղի ձկնորսներից վարձակալել են այդ նավը: Ներկայումս նրանք ձերբակալված են և ցուցմունքներ են տալիս: Նշվում է, որ նավը խորտակվել է ափից 50 մետր հեռավորության վրա:
