Արարատի և Վայոց ձորի մարզերի ընդհանուր իրավասության դատարանում այս պահին շարունակվում է ամուսնու և սկեսրոջ կողմից բռնության ենթարկված Մարիամ Գևորգյանի հայցի քննությունն ընդդեմ սկեսրոջ` Հայկանուշ Միքայելյանի: Դատարանն այս պահին ընդմիջում է հայտարարել պաշտպանական կողմից ներկայացված միջնորդությունը քննարկելու համար: Այս մասին «Առաջին լրատվական»-ին փոխանցեց Մարիամ Գևորգյանի փաստաբան Նոնա Գալստյանը, որի հավաստմամբ` դատավարությունը դռնափակ պայմաններում է, սակայն ընթանում է նորմալ դատաքննություն:
Նշենք, որ ինչպես փաստաբանն արդեն հայտնել էր «Առաջին լրատվական»-ին, դռնփակ դատավարությունն արդեն մոտ է ավարտին. դատարանն անցել է ապացույցների հետազոտման փուլին:
Հիշեցնենք, որ ինչպես ինքը՝ տուժած հարսն է պատմել, սկեսուրը՝ Հայկանուշ Միքայելյանը, իրեն խոշտանգումների է ենթարկել որդու` Դավիթ Զիրոյանի հետ: Գևորգյանը Զիրոյանի հետ ամուսնացել է 2009 թվականի նոյեմբերին, նույն տարվա դեկտեմբերին տեղափոխվել է Սանկտ Պետերբուրգ, որտեղ իրեն 10 ամսվա ընթացքում պարբերաբար ծեծի և կտտանքների են ենթարկել: Երևան վերադառնալուց հետո Գևորգյանը դիմել է ոստիկանություն: Ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն՝ նրան կարող էին դատապարտել մինչև 3 տարվա ազատազրկման:
Դատարանի որոշմամբ` Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի կողմից հայտարարված համաներմամբ: Հայկանուշ Միքայելյանի դեմ առաջադրվել է մեղադրանք Քրեական օրենսգրքի 113 (միջին ծանրության վնասվածքներ հասցնել) և 119 (խոշտանգում) հոդվածներով:
