ՌԴ նախագահ Վլադիմիր Պուտինը հնարավոր է համարում լուծել ՀՀՊ-ների խնդիրը, եթե Բարաք Օբաման վերընտրվի ԱՄՆ նախագահ:
«Հնարավո՞ր է արդյոք լուծել այդ խնդիրը, եթե Միացյալ Նահանգներում երկրորդ անգամ վերընտրվի նախագահ Օբաման: Սկզբունքորեն` այո: Սակայն խնդիրը Օբամայի հետ չի կապված: Ինձ թվում է` նա անկեղծորեն ցանկանում է լուծել այդ խնդիրը»,- հայտարարել է Պուտինը Russia Today հեռուստաալիքին տված հարցազրույցում:
Պուտինը հիշեցրել է Օբամայի հետ իր հանդիպման մասին՝ հունիսին Մեքսիկայի Լոս Կաբոսում «Մեծ քսանյակի» գագաթաժողովի շրջանակում:
«Մենք հնարավորություն ունեինք խոսելու: Ճիշտ է, ավելի շատ խոսում էինք Սիրիայի մասին, սակայն ես ամեն դեպքում զգում էի իմ գործընկերոջ, զրուցակցի տրամադրվածությունը: Ըստ իս` նա անկեղծ մարդ է ու իրականում ուզում է շատ բան դեպի լավը փոխել: Սակայն կկարողանա՞ նա այդ անել, կթողե՞ն արդյոք: Քանզի կա ռազմական լոբբի, կա Պետդեպն իր պահպանողական մեքենայով: Ի դեպ, այն քիչ է տարբերվում մեր արտգործնախարարությունից: Այնտեղ տասնամյակներ շարունակ ձևավորվել են պրոֆեսիոնալ կլաններ»,- նշել է Պուտինը:
«Մեր ամերիկացի գործընկերներն ասում են, որ դա մեր դեմ չէ: Իսկ ի՞նչ կլինի, եթե Միացյալ Նահանգների նախագահ դառնա Ռոմնին, որը մեզ համարում է համար առաջին թշնամի: Նշանակում է, դա այդ ժամանակ հաստատ կուղղվի մեր դեմ: Ու եթե նկատի ունենանք, որ ՀՀՊ-ն հաշվարկված չէ մեկ տարվա ու անագամ ոչ մեկ տասնամյակի համար, ապա շատ մեծ է Ռոմնիի պես հայացքներ ունեցող մեկի իշխանության գալու հավանականությունը: Ինչպես պետք է մենք մեզ պահենք , որպեսզի ապահովենք մեր անվտանգությունը»,- ընդգծել է ՌԴ նախագահը:
Նրա խոսքով` այն բանի համար, որ ՀՀՊ-ների հարցը լուծվի, պետք է համաձայնել ու ընդունել, որ Մոսկվան ու Վաշինգտոնը հուսալի գործընկերներ ու դաշնակիցներ են մեկը մյուսի համար: