Պերուացի զինծառայողների հետ բախման հետևանքով այսօր սպանվել է ապստամբական ձախ արմատական «Շողացող ուղի» (Sendero Luminoso) խմբավորման ղեկավարներից մեկը: Այս մասին հայտնում է Agence France-Presse-ը` հղում կատարելով Պերուի նախագահ Օլյանտ Ումալին:
43-ամյա սպանվածի անունը Ռոլանդո Կաբեսաս Ֆիգերոա է, ով հայտնի է «ընկեր Վիլյամ» անունով: Նա սպանվել էր Պերուի հարավում` Այակուչո շրջանում:
Տղամարդը կազմակերպության շարքերում է եղել 22 տարի ու ղեկավարել է այն ստորաբաժանումները, որոնք հարձակումներ էին իրականացնում ջունգլիներում կառավարական բազաների վրա:
Ումալի խոսքով` Ֆիգերոան եղել է նշանակությամբ երկրորդ մարդը խմբավորման մեջ, որի անդամները մաոիզմի հետևորդներ են:
Կազմակերպությունը ձևավորվել է 1960-ականներին, իսկ 1980-ից դրա անդամները սկսեցին զինված պայքար կառավարության դեմ:
«Շողացող ուղին» աջակցում է բնակչության աղքատ շերտերին: Պերուի իշխանությունները խմբավորումը համարում են ահաբեկչական կազմակերպություն:
