Երեկ «Հրապարակ»-ի խմբագրություն էին զանգել սևանցիներ և խնդրում էին տպագրել իրենց նամակը, որն ուղարկել էին 2 օր առաջ: Ասում էին, որ նամակը գրելուց հետո վիճակը Սևան քաղաքում ավելի է սրվել` բոլոր թեկնածուներին ստիպում են հանել իրենց թեկնածությունները, որ «Ուդոն մնա մենակ»: Եվ մոտակա օրերին ինքնաբացարկ են հայտնելու նաև մյուս թեկնածուները, որ Ուդոն հեշտուհանգիստ անցնի: Խոսքը Գեղարքունիքի նախկին մարզպետ Ռուդիկ Ղուկասյանի մասին է, ում ՀՀԿ-ն որոշել է քաղաքապետ դարձնել: Ահա թե ինչ են գրում սևանցիները.
«Հարգելի խմբագրություն, խնդրում ենք ձեր թերթի միջոցով լուսաբանեք մեզ` խավարամիտներիս, թե ՀՀ-ընտրովի մարմիններում ովքեր կարող են առաջադրվել` ըստ ՀՀ Սահմանադրության: Եթե մենք ապրում ենք ազատ, անկախ, իրավահավասար երկրում, ապա խնդրում եմ լուսաբանեք, թե ինչպես եղավ, որ Գեղարքունիքի մարզի Սևան քաղաքի համայնքապետի ընտրություններում առաջադրվելը դարձավ պատուհաս թեկնածուների գլխին: Այս գործընթացին մասնակցելու համար հանկարծ հայտնվեց Ռուդիկ Ղուկասյանը (Ուդոն)` իր հովանավոր Հովիկ Աբրահամյանի հետ: Եվ Սևան քաղաքը, որը ՀՀ-ում հայտնի է որպես հանգստավայր, մարդկանց համար դարձավ անհանգիստ բնակավայր, եթե Ուդոն կթողնի, որ մնա որպես այդպիսին:
Եթե մենք պետք է ընտրենք մեր համայնքի ղեկավարին, ինչո՞ւ է Հովիկ Աբրահամյանը Սահմանադրությունից հանում ՀՀ քաղաքացու ազատության մասին եղած հոդվածը կամ էլ, որպես Ազգային ժողովի նախագահ, ինչո՞ւ է խախտում Ընտրական օրենսգիրքը: Եվ մինչև ե՞րբ պետք է մենք մեր երկրում ապրենք վախի մթնոլորտում` ահաբեկված: Եվ եթե Ուդոն Սևանի միակ փրկիչն է, ըստ Հովիկ Աբրահամյանի, ապա նա իր գիտակցական կյանքում զբաղեցրել է բարձր պաշտոններ: Ինչո՞ւ հիմա հիշեց Սևանի և սևանցիների պրոբլեմների մասին: Ըստ սևանցիների` նրա ավարը կիսատ է, գալիս է լրացնելու:
Հարգելի խմբագրություն, խնդրում ենք ձեր թերթի միջոցով հիշեցնեք Աժ նախագահին, որ չխառնվի մեր համայնքի ղեկավարի ընտրություններին, թույլ տա, որ սևանցիներն իրենք ընտրեն համայնքի ղեկավար, իսկ եթե հետապնդումներն ու հալածանքները շարունակվեն, ապա մենք` սևանցիներս, ցանկացած երկրի հյուպատոսությունից ապաստան կխնդրենք: Թող Ուդոն ու Հովոն Սևանում հաստատեն իրենց դիկտատուրան: Միայն այս անգամ Սևանի համայնք ասելով, կհասկանանք` Ուդոն և յուր ընտանիքը»:
