Հունիսի 22-ին ՀՀ նորընտիր ԱԺ-ն միանգամից 2 ընթերցմամբ ընդունեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքի փոփոխությունները, որով Սևանից 2012թ.-ին ոռոգման նպատակով պետք է բաց թողնվեր 320 միլիոն խմ ջուր:
Օգոստոսի 30-ին կառավարությունը հաստատել էր Սևանա լճից ջրի բացթողումների ծավալը աննախադեպ` 319.2 միլիոն խմ ցուցանիշի հասցնելու որոշման նախագիծը:
Այս ցուցանիշն այսօր իրացվում է, որն աննախադեպ ցուցանիշ է: «Առաջին լրատվական»-ի հետ զրույցում նման տեսակետ հայտնեց «Էկոլուր» հասարակական դաշինքի ղեկավար Ինգա Զառաֆյանը: Նա նշեց, որ օրենքով սահմանված էր Սևանա լճից բաց թողնել 170 խորանարդ մետր ջուր, սակայն սահմանված ծավալից լրացուցիչ 150 խորանարդ մետր ջուր են բաց թողել, որովհետև կառավարության վերջին որոշումները` լրացուցիչ ծավալի վերաբերյալ, ընդունվեցին, իսկ պետկոմիտեն հատուկ հայտարարություն է արել, թե նախատեսված ծավալից քիչ ջուր են վերցրել:
Պետկոմիտեի այս հայտարարության վերաբերյալ բնապահպանն ասաց. «Սա նշանակում է ձեռ առնել: Սևանի հարցերով փորձագիտական հանձնաժողովը սահմանել էր, որ կարելի է վերցնել միայն 280 խորանարդ մետր ջուր, նույնիսկ հանձնաժողովի կարծիքը հաշվի չի առնվել, և ինչքան նախատեսել էին, այնքան էլ վերցրել են, իսկ մեզ ասում են, թե քիչ են վերցրել: Այս ջուրն արդեն բաց է թողնվել, ի՞նչ կարող ենք անել, Սևանա լճի ջրից վերջին միլիոններն են գնում, ի՞նչ պետք է անենք, դրանք արդեն գնացել են, վերջին 10-20 մլն խորանարդ մետր ջուրն արդեն դուրս է գալիս Սևանից»:
Ինգա Զառաֆյանի դիտարկմամբ՝ Սևանա լճի մակարդակն արդեն իջել է: Նա ասաց, որ վերջին ամիսներին բազմիցս եղել են Սևանում, և անզեն աչքով էլ նկատելի է, որ ջրի մակարդակն իջել է:
«Հերթական որոշումն էր, հերթական իջեցումը: Եթե մենք խաղ անենք Սևանի հետ, ապա դա մեզ ոչ ոք չի ների: Մարդն ո՞վ է, որ պետք է խաղա մեծ լճի էկոհամակարգի հետ: Կների՞ այդ համակարգը մեզ: Այնպիսի հարված կտա, որ ոչ ոք չի կարողանա պատասխան կրել: Ո՞վ պետք է պատասխան տա. սա է խնդիրը»,- ցավով եզրափակեց իր խոսքը Ինգա Զառաֆյանը:
