ՀՀ ԱԺ նախագահն ընդունեց ԵՄ հատուկ ներկայացուցչին

Փետրվարի 24-ին ՀՀ ԱԺ նախագահ Հովիկ Աբրահամյանն ընդունեց Հարավային Կովկասում ԵՄ հատուկ ներկայացուցիչ Փիթեր Սեմնեբիին` նրա լիազորությունների ժամկետը ավարտվելու կապակցությամբ:

ԱԺ նախագահը, բարձր գնահատելով պարոն Սեմնեբիի կատարած աշխատանքը, որը մեծապես նպաստել է Հայաստան-ԵՄ հարաբերությունների զարգացմանը և խորացմանը, նշեց, որ Հայաստանը մշտապես կարևորել է Եվրամիության հետ փոխգործակցությունը, իսկ Արևելյան գործընկերության մեկնարկով Հայաստանի և ԵՄ-ի միջև դինամիկ կերպով զարգացող քաղաքական երկխոսությունը որակական նոր մակարդակի վրա է դրվել:

Շնորհակալություն հայտնելով ընդունելության համար և ներկայացնելով իր հնգամյա գործունեության արդյունքները` Փիթեր Սեմնեբին կարևոր ձեռքբերում համարեց Եվրամիության ներսում Հայաստանի մասին տեղեկացվածության բարձրացումը, ինչպես նաև ասոցացման համաձայնագրի բանակցությունների մեկնարկը, ինչը նոր հեռանկարներ է բացում առաջիկայում Եվրամիության հետ էլ ավելի ընդգրկուն համագործակցություն նախատեսող պայմանագրային հարաբերություններ հաստատելու առումով:

Հանդիպման ընթացքում զրուցակիցներն անդրադարձան նաև ԼՂ հակամարտության կարգավորմանը, հայ-թուրքական հարաբերություններին և երկկողմ հետաքրքրություն ներկայացնող այլ հարցերի:

ՀՀ ԱԺ հասարակայնության և տեղեկատվության միջոցների հետ կապերի վարչություն