Հարավային Կովկասի երկրներ, ինչպես նաև Ալբանիա և Բոսնիա կատարելիք այցի շրջանակներում Երևան ժամանած ԱՄՆ պետքարտուղարի առաջին տեղակալ Ջեյմս Սթեյնբերգի այցը իսկապես ուշագրավ էր:
Նախ «Առաջին լրատվականին» հաջողվեց պարզել, որ նա բավական խորհրդավոր պայմաններում է հանդիպել հայաստանյան հասարակական սեկտորի ներկայացուցիչների հետ` վերջիններիս հետ համաձայնություն է ձեռք բերվել` չբացահայտել հանդիպմանը քննարկված հարցերի շրջանակը:
Այս հանդիպման մասին տեղեկատվություն Հայաստանում ԱՄՆ դեսպանատունը չտարածեց, սակայն «Առաջին լրատվականին» հաջողվեց պարզել, որ հայաստանյան հասարակական սեկտորի հետ հանդիպմանը մասնակցել են ընդամենը չորս կազմակերպության ներկայացուցիչներ` Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, Սոնա Այվազյանը` «Թրանսփարենսի ինթերնեյշնլ» հակակոռուպցիոն կենտրոնից, Լարիսա Մինասյանը` Բաց հասարակության հիմնադրամից և ԵԱՀԿ հայաստանյան գրասենյակից ևս մեկ աշխատակից:
Նկատենք նաև, որ Ջ.Սթեյնբերգը, իր կարգավիճակով լինելով ԱՄՆ պետքարտուղարի տեղակալ, չի այցելել անգամ ՀՀ ԱԳՆ:
Երեկ ամերիկացի բարձրաստիճան դիվանագետին ընդունել էր Սերժ Սարգսյանը, որի հետ հանդիպմանը մասնակցել է նաև ԱԳ նախարար Էդվարդ Նալբանդյանը:
Մինչդեռ Վրաստանում Սթեյնբերգը, բացի Վրաստանի նախագահ Միխեիլ Սաակաշվիլիի հետ հանդիպումից, հանդիպել է նաև Անվտանգության խորհրդի քարտուղար Գիգա Բոկերիայի և Վրաստանի փոխարտգործնախարար Սերգի Կապանաձեի հետ, ինչպես նաև հասարակական կազմակերպությունների ներկայացուցիչների և Վրաստանի ժողովրդական պաշտպան Գեորգի Տուգուշիի հետ: