Իսլամաբադում ԱՄՆ դեսպանատունը հերքել է Պակիստանում իրականացված պայթյունի հետևանքով երկու ամերիկացիների զոհվելու լուրը: Դեսպանատան տվյալներով՝ Փեշավարում ամերիկյան հյուպատոսարանի մեքենայի վրա հարձակման հետևանքով վիրավորվել են հյուպատոսության 4 աշխատակիցներ՝ 2 Պակիստանի և 2 ԱՄՆ քաղաքացիներ:
«Հյուպատոսության աշխատակիցներից ոչ ոք չի սպանվել, բայց մենք փորձում ենք տեղեկություն գտնել այդ սարսափելի գործողության մյուս զոհերի մասին»,- հայտարարել են դեսպանատնից՝ պատրաստակամություն հայտնելով համագործակցել Պակիստանի իշխանությունների հետ:
Ավելի վաղ հաղորդվում էր, որ ահաբեկչության ժամանակ սպանվել են ԱՄՆ երկու քաղաքացիներ, ևս երկուսը վիրավորվել են: Հարձակումն իրականացվել էր այսօր առավոտյան. 110 կգ պայթուցիկով ավտոմեքենան բախվել էր ԱՄՆ դեսպանատան ավտոմեքենային: Առայժմ հարձակման համար ոչ ոք պատասխանատվություն չի վերցրել:
