Հոկտեմբերի 29-ին ՀՀ ԱԺ նախագահ Հովիկ Աբրահամյանն ընդունեց Մոնրեալի քաղաքապետ Ժերալդ Թրեմբլեյի գլխավորած պատվիրակությանը: Հանդիպմանը ներկա էր Երեանի քաղաքապետ Գագիկ Բեգլարյանը:
Ողջունելով հյուրերին` Հովիկ Աբրահամյանը անհրաժեշտ համարեց Կանադայի հետ հարաբերությունների խորացումը, միջխորհրդարանական կապերի ակտիվացումը եւ որպես ԱԺ նախագահ` պատրաստակամություն հայտնեց աջակցել խթանելու փոխգործակցությունը տարբեր ուղղություններով: Երկկողմ հարաբերությունների զարգացման համատեքստում ԱԺ նախագահը կարեւորեց տեղական ինքնակառավարման մարմինների միջեւ գործակցությունը եւ այս ուղղությամբ կատարված կարեւոր քայլ համարեց Երևանի ու Մոնրեալի միջեւ առկա ջերմ հարաբերությունները: Նա համոզմունք հայտնեց, որ քույր քաղաքների միջև հաստատված փոխգործակցությունն իր ուրույն դերակատարությունը կունենա երկու երկրների եւ ժողովուրդների միջեւ հարաբերությունների զարգացմանը: ԱԺ նախագահը կարեւորեց նաեւ կոնկրետ ծրագրերի իրականացումը:
Շնորհակալություն հայտնելով ընդունելության համար` Մոնրեալի քաղաքապետը կարեւոր համարեց երկկողմ շփումների ակտիվացումը, մշակութային եւ կրոնական զբոսաշրջության զարգացումը, տնտեսական փոխգործակցությունը, ինչը կարող է մեծապես նպաստել երկու երկրների միջեւ բարեկամական հարաբերությունների ամրապնդմանը: Պարոն Թրեմբլեյը ԱԺ նախագահ Հովիկ Աբրահամյանին փոխանցեց Կանադա պաշտոնական այց կատարելու Կանադայի խորհրդարանի նախագահի հրավերը: