Apple ընկերությունը ամերիկյան դատարան նոր հայց է ներկայացրել Samsung-ի դեմ` պահանջելով ԱՄՆ-ում արգելել հարավկորեական ընկերության կողմից թողարկված չորս բջջային հեռախոսների վաճառքը, այդ թվում` մայիսին վաճառքի դուրս բերված Galaxy S III սմարթֆոնը: Այս մասին հաղորդում է Reuters գործակալությունը:
Դիտորդները նշել են, որ ըստ ատենակալների մեկ շաբաթ առաջ հրապարակված որոշման` ԱՄՆ-ում կարող է արգելվել միայն հեռախոսների հնացած մոդելների վաճառքը, իսկ Apple-ի հայցը վերաբերում է բոլորովին նոր սմարթֆոնների:
Ամերիկյան ընկերությունը հայց է ներկայացրել Սան Խոսեի այն նույն դատարանում, որտեղ տեղի են ունեցել անցած դատական գործի լսումները, որոնք ավարտվել էր Samsung-ի պարտությամբ: Հարավկորեական ընկերությունը պետք է 1,05 մլրդ դոլար վճարի իր բջջային հեռախոսներում Apple-ի կողմից արտոնագրված տեխնիկական բնութագրեր օգտագործելու համար:
