Ախթալայի քաղաքապետին ուղղված կրակոցները՝ «շանտաժի» պատասխա՞ն

Մեր աղբյուրների փոխանցմամբ, նախնական տեղեկություններով՝ Լոռու մարզի Ախթալա քաղաքի գործող քաղաքապետ, առաջիկա ՏԻՄ ընտրություններում քաղաքապետի պաշտոնի թեկնածու Հայկազ Խաչիկյանի ավտոմեքենայի ուղղությամբ արձակված կրակոցները կարող են «շանտաժի» պատասխան լինել: «Հետքի» հաղորդած նախնական տեղեկություններով՝ կրակողը եղել է Ախթալայի լեռնահարստացման կոմբինատի անվտանգության ծառայության պետ, «Բոդոլ» մականունով Արսեն Չիթչյանը: Որքանով է դա ճիշտ՝ հայտնի չէ, սակայն այս տեղեկությունը կարող է ամբողջացնել մեզ հասած հետևյալ տեղեկությունը:

Մեր աղբյուրների տրամադրած տեղեկությունների համաձայն՝ քանի որ Խաչիկյաններն ու Ախթալայի լեռնահարստացուցիչ կոմբինատի սեփականատեր, մանկապղծության մեջ մեղադրված Սերոբ Տեր-Պողոսյանը լուրջ հակասություններ ունեն, վերջինիս թիմակիցները որոշել են առաջիկա ընտրություններում աշխատել Հայկազ Խաչիկյանի մրցակից թեկնածուի՝ Սուրեն Թամազյանի օգտին: Բայց որպեսզի նման բան տեղի չունենա, ըստ շրջանառվող լուրերի, Խաչիկյանի կողմնակիցները՝ ինչ-որ անձինք, մտել են Սերոբ Տեր-Պողոսյանից տուժած երեխաների բնակարանները և նրանց ընտանիքների անդամներին «խստորեն հորդորել» չաշխատել Թամազյանի օգտին, այլապես նրանց երեխաներին պղծելու տեսաձայնագրությունները կհայտնվեն շրջանառության մեջ: Դա զայրացրել է Ախթալայի բնակիչներին, ովքեր գնացել են Հայկազ Խաչիկյանի հայրական տուն՝ այնտեղ կոտրել նրանց տան գույքը, վիճաբանել, իսկ դրան հետևել են Հայկազ Խաչիկյանի մեքենայի ուղղությամբ կրակոցները, որից գործող քաղաքապետ Խաչիկյանը չի տուժել:

Սրանք դեռ նախնական տեղեկություններն են, որոնք կհերքվեն կամ կհաստատվեն հետագայում:

Լուսանկարը՝ hetq.am-ի