Անգլիայում` Քենտում, իր տիրուհու հետ ապրող շունը փախել է տնից և ինքնուրույն գնացքով ճամփորդել է մինչև Լոնդոն, գրում է KentOnline-ը: Կենդանուն վերադարձնելու համար տիրուհին ստիպված է եղել 59 ֆունտ ստեռլինգ ծախսել. հենց այդքան է արժեցել նրա հետևից գնալը:
6-ամյա Ֆրենկին տնից փախել էր օգոստոսի 22-ին: Նա անցել է ավելի քան երկուսուկես կմ մինչև Քենտի երկաթուղային կայարանը և նստել է մայրաքաղաք մեկնող ճեպընթացը: Օգոստոսի 28-ին հրապարակվել են կայարանում և գնացքում տեղադրված տեսախցիկների տեսանկարահանումները: Դրանցում երևում է, որ շունը ցատկել է գնացքի մեջ, ուղևորների միջով անցել է միջանցքներով` ազատ տեղ ընտրելով:
Երբ գնացքի հսկիչը հայտնաբերել է անտոմս շանը, գնացքն արդեն վերջին կայարան հասնելիս է եղել: Կայարանի աշխատակիցները տերյերի տիրոջ հետ կապվել են նրա վզնոցի վրա նշված հեռախոսահամարով:
2012-ի հուլիսին Իռլանդիայում նույն ցեղատեսակի մեկ այլ շուն, փախչելով տնից, իրեն գցել է Դուբլին գնացող գնացքը: Վերջին կայարանում է պարզվել, որ նա առանց տիրոջ է երթևեկում: Կայարանի աշխատակիցները նրա նկարը տեղադրել էին Twitter-ում և այդպիսով՝ գտել տիրոջը:
