Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվել է Երևանի Վ. Բրյուսովի անվան պետական լեզվաբանական համալսարանի նախկին ռեկտոր Սուրեն Զոլյանի կողմից ԿԳ նախարարի հրամանը վիճարկող դատաքննությամբ չորրորդ նիստը, որով կրկին դատարանը դեռ չի անցել դատաքննական փուլին: Զոլյանը, ինչպես հայտնի է, վիճարկում է իր լիազորությունները դադարեցնելու և 2008 թվականի մարտի 17-ի թիվ 134 աշխատանքային պայմանագիրը լուծելու վերաբերյալ ԿԳՆ որոշումը:
Երևանի Վ. Բրյուսովի անվան պետական լեզվաբանական համալսարանի նախկին ռեկտորին դատարանում ներկայացնող փաստաբան Լիանա Գրիգորյանը «Առաջին լրատվական»-ի հետ զրույցում նշեց, որ իրենք այսօր դատարանում ներկայացրել են 2009-2012 թվականներին ստացված հրամանները, պատասխանող կողմը ներկայացրել է մի շարք փաստաթղթեր, սակայն քանի որ դատարանը դրանք դեռ ամբողջությամբ չի ուսումնասիրել, այսօր դատարանում հնչել են ընդամենը մի քանի հարցուպատասխաններ, որոնցով էլ եզրափակվել է նիստը և հետաձգվել մինչև սեպտեմբերի 11-ը:
Լիանա Գրիգորյանի խոսքով` պատասխանող կողմը դեռևս չի ապացուցել, թե ինչ իրավունքով է ստուգումներ անցկացրել համալսարանում և ինչ խախտումներ է հայտնաբերել, որի հիման վրա Զոլյանին ազատել են աշխատանքից: Դա, ըստ երևույթին, կպարզաբանվի արդեն դատաքննական փուլում:
Նշենք, որ Հայաստանի վարչական դատարանը հրաժարվել էր Վ. Բրյուսովի անվան Երևանի պետական լեզվաբանական համալսարանի (ԵՊԼՀ) նախկին ռեկտոր Սուրեն Զոլյանի հայցն ընդունել, որում նա խնդրում էր չեղյալ համարել 2012թ. ապրիլի 6-ին Հայաստանի կրթության և գիտության նախարար Արմեն Աշոտյանի հայտարարած խիստ նկատողությունը: Նախկին ռեկտորը մտադիր է հետագայում այն վիճարկել Վճռաբեկ դատարանում, այնուհետև` Սահմանադրական և ՄԻԵԴ դատարաններում:
Հիշեցնենք, որ ապրիլի 6-ին ԵՊԼՀ ռեկտոր Սուրեն Զոլյանի նկատմամբ կիրառվել էր կարգապահական տույժ` խիստ նկատողության տեսքով: Նկատողության պատճառն այն էր, որ Սուրեն Զոլյանը հրաժարվել է կատարել իր վերադասի հանձնարարականը, երկրից բացակայել է առանց հարգելի պատճառի` իր պարտականությունները բավարար չափով չկատարելով: Ի պատասխան՝ Զոլյանը դիմել է դատարան: Առաջին նկատողությանը ապրիլի 17-ին հետևել է երկրորդը, այնուհետև նախարարի հրամանը` Բրյուսովի անվան ԵՊԼՀ ռեկտոր Սուրեն Զոլյանի լիազորությունները դադարեցնելու և 2008 թ.մարտի 17-ի թիվ 134 աշխատանքային պայմանագիրը լուծելու մասին:
