Առաջիկա նախագահական ընտրություններում ընդդիմադիր միասնական թեկնածուով հանդես գալու, ինչպես նաև վարչապետի հնարավոր պաշտոնանկության վերաբերյալ «Հայկական ժամանակ»-ի հարցերին երեկ պատասխանել է Աժ ՀՅԴ խմբակցության պատգամավոր, ՀՅԴ ԳՄ անդամ Արծվիկ Մինասյանր:
– Պարոն Մինասյան, մի քանի ամիս առաջ ՀՅԴ ԳՄ ներկայացուցիչ Արմեն Ռուսաամյանը մեզ հետ զրույցում ասել էր, որ առաջիկա նախագահական ընտրություններում հնարավոր է պայմանավորվել ընդդիմադիր միասնական թեկնածուի շուրջ, եթե ընդդիմադիր քաղաքական ուժերը համաձայնության գան մի քանի սկզբունքների շուրջ: Այդ հարցով որոշակի առաջընթաց կա՞, քաղաքական մյուս ուժերի հետ քննարկումներ եղե՞լ են: Կարո՞ղ է լինել միասնական թեկնածու, թե` ոչ:
– Այս պահի դրությամբ պահպանվում է այն, ինչ ասել է Արմեն Ռուստամյանը, մեզ համար առաջնակարգը գաղափարն ու սկզբունքն է, իսկ անձը, միասնական թեկնածուն ստորադասվում է այս մոտեցմանը, այլ կերպ ասած, մենք կոնկրետ անձի խնդիր չենք դնում: Եվ եթե լինի մի այնպիսի սկզբունք, որը կբերի քաղաքական դաշտի, հասարակական ակտիվ հատվածի և քաղաքացիների մի զգալի հատվածի պաշտպանությանը այդ գաղափարներին, կարծում եմ, միասնական թեկնածուի հարց կարող է քննարկվել, մանավանդ որ անձից կախված է լինելու անցումային փուլում մի շարք գործողությունների նախաձեռնումը, այդ թվում` և’ սահմանադրական փոփոխությունների, և’ օրենսդրական, և’ նաև կամքի դրսևորումը, որը պայմանավորված է լինելու ընտրությունների ազատ անցկացման մոտեցումը որդեգրելով:
– Այսինքն, կշարունակվե՞ն այդ հարցի շուրջ քննարկումները:
– Կարծում եմ` այո, և ոչ միայն քննարկումներ, նաև լայն համագործակցության առաջարկ` բացառելով որևէ կոնկրետ անձի մասին անընդհատ խոսելը: Կարծում եմ, բոլոր քաղաքական ակտիվ տարրերը նույնպես այդպիսի ցանկություն ունեն, որ առաջնահերթ քննարկվի ոչ թե անձը, այլ գաղափարը և մոտեցումները, որովհետև երբ մենք անձին ենք բերում առաջին պլան, կորցնում ենք համախմբման իրական հնարավորությունը: Մինչդեռ, եթե սկզբում գաղափարն ու մոտեցումը առաջ բերենք և այնուհետև քննարկենք անձը` այդ գաղափարի ներքո, կարծում եմ, շատ ավելի մեծ հնարավորություն կունենանք միասնական թեկնածու ձևավորելու հարցում: Այս պահին, կարծում եմ, այդպիսի թեկնածուի հնարավորությունը պահպանվում է ընդդիմադիր դաշտում, չի բացառվում նաև, որ իշխանական հատվածից էլ լինեն ուժեր, ներկայացուցիչներ, ովքեր ևս այդ գաղափարները կարող են ընդունել և փորձել քննարկման առարկա դարձնել իրենց մոտեցումները:
– Իշխանական հատվածից ո՞ւմ նկատի անեք:
– Բոլոր այն ուժերին, ովքեր թե’ փաստացի իշխանություն են և թե’ նաև պաշտպանում են իշխանության գործողությունները:
– Իսկ ԲՀԿ-ն կարո՞ղ է ընդգրկվել այդ համագործակցության մեջ:
– Եթե ԲՀԿ-ն ընդունի այդ մոտեցումները և գնա Հայաստանի կառավարման համակարգը փոխելու, ի վերջո, վարչատարածքային նոր բաժանում իրականացնելու, ընտրական գործընթացը ակտիվ և արդար հիմքի վրա դնելու, ինչու չէ` նաև քաղաքական ընդդիմությանը իշխանությունների վերահսկողության լծակներ տրամադրելու ուղղությամբ, կարծում եմ` այո:
– Այսօր Աժ նախկին պատգամավորներից մեկը հայտարարել է, որ ամբողջ ամառ քաղաքական ուժերի միջև քննարկումներ են ընթացել նախագահական ընտրությունների թեմայով, առաջիկայում էլ շարունակվելու են: ՀՅԴ-ն մասնակցե՞լ է նման քննարկումների, տեղյա՞կ եք, ինչի մասին է խոսքը:
– Կարծում եմ, եթե այդպիսի առանձին քննարկումներ եղել են, դա դեռ ոչինչ չի նշանակում, որովհետև ի վերջո կա ձևաչափ, կա հստակ մեխանիզմ, որը նախատեսում է այդպիսի քննարկումը, և դրա վերաբերյալ համապատասխան հայտարարություն է արվում: Դեռ հայտարարություններ կուսակցությունների մակարդակով չկան արված, և պետք է ընդունել, որ չկա նաև այդպիսի գործողություն:
– Իսկ ՀՅԴ-ն այս ընթացքում քննարկե՞լ է սեփական թեկնածուով հանդես գալու հարցը, և ո՞վ կարող է լինել այդ թեկնածուն: Ավելի հավանական է, որ սեփական թեկնածուով հանդես գա՞ք, թե՞ սատարեք մեկ այլ ուժի թեկնածուի:
– Ինչպես հայտնի է, ՀՅԴ Գերագույն ժողովից հետո կգումարվի արտակարգ ևս մեկ ժողով, որի ժամանակ կքննարկվեն մեր աշխատանքի ընթացքն ու արդյունքները, որոնք շարունակվել են ձեռնարկվել այս ընթացքում, և որտեղ կորոշվեն միասնական թեկնածուի, ՀՅԴ թեկնածուի հարցերը:
– Ե՞րբ է նախատեսված ժողովը:
– Դեռևս հստակ ժամկետ չկա նախատեսված:
– Նախորդ գումարման Աժ-ում դաշնակցությունը կառավարությանն անվստահություն հայտնելու նախագիծ էր ներկայացրել: Հնարավո՞ր է, որ այս անգամ ևս նման նախաձեռնությամբ հանդես գաք:
– Քանի որ առաջիկայում նախագահական ընտրություններն են, հավանաբար, կառավարությանն անվստահություն հայտնելու խնդիրը ներկայումս հրատապության այդ կարգը չունի, բայց մյուս կողմից` չի բացառվում, որ ցանկացած ժամանակ, օգտվելով Աժ կանոնակարգով ընձեռված հնարավորությունից, մենք կարող ենք հանդես գալ համանման հարցապնդումներով, այնուհետև ներկայացնենք նաև որոշման համապատասխան նախագիծ: Բայց այս պահին մեր ծրագրային մոտեցումներում դեռևս չկա այդպիսի խնդիր:
– Քաղաքական կուլիսներում անընդհատ խոսվում է վարչապետի փոփոխության մասին, և այդ նույն շրջանակները վստահեցնում են, որ 2001 թվականի բյուջեի կատարման մասին հաշվետվության ժամանակ լուրջ սրացումներ կլինեն Աժ-ում: Հնարավոր համարո՞ւմ եք, որ հաշվետվության հաստատման ժամանակ խորհրդարանական 4 ուժեր` Կոնգրեսը, ՀՅԴ-ն, ԲՀԿ-ն և «Ժառանգությունը», կարողանան հասնել այդ հաշվետվության տապալմանը, ինչը ենթադրում է կառավարության անվստահության հարց դնել:
– Այս պահին ակնհայտ է, որ ինչպես նախորդ տարիների բյուջեները, այս բյուջեն նույնպես չի փայլում իր կատարողական վարպետությամբ, և բնական է` սա կարող է բերել որոշակի սրացումների: Բայց այնպիսի հետևանքներ, որոնք կարող են հանգեցնել կառավարությանն անվստահություն հայտնելուն կամ կառավարությունը ցրելուն, այս պահին, ցավոք, չեմ տեսնում: Այլ բան, որ կատարողականի հաշվետվությունը ևս մեկ առիթ է, որպեսզի հնարավորինս բացահայտվեն ներկա կառավարության թույլ կողմերը, և եթե նույնիսկ դա չհանգեցնի կառավարության հրաժարականին, ապա առնվազն որոշակի ճշգրտումների հնարավորություն պետք է տա կառավարության գործունեության մեջ:
