Չորս ամերիկացի զինվորականներ ռազմական հեղաշրջում և նախագահի դեմ մահափորձ էին նախապատրաստում: Նման հայտարարությամբ հանդես է եկել Ջորջիա նահանգի դատախազությունը և նրա ներկայացուցիչ Իսաբել Փոլին:
Դավադիրների մոտ Ֆորտ-Ստյուարտ ռազմաբազայում հայտնաբերել են զենք և զինամթերք: Զինամթերքի գնման համար ծախսվել էր 87 հզ դոլար:
Փոլիի խոսքերով` հետաքննությունը հաստատել է, որ ձերբակալվածները մտել են Ֆորտ-Ստյուարտում գործող հակակառավարական ծայրահեղական «Ընդմիշտ անմահ, միշտ պատրաստ» խմբավորման մեջ: Նրա ղեկավարը շարքային Այզեք Ագիգին հրամայել է սպանել զորացրված 19-ամյա Մայքլ Ռորկին, որպեսզի նա իշխանություններին չմատնի դավադրության մասին:
Ծայրահեղականներն անցած տարվա դեկտեմբերին հաշվեհարդար են տեսել Ռորկի և նրա հարսնացուի հետ ռազմաբազայի հարակից անտառում:
Դատախազի տվյալներով` դավադիրները մտադիր էին գրավել ռազմաբազայի զինամթերքի պահեստները, պայթեցնել ներքին անվտանգության շենքը և Վաշինգտոնի ջրային կառույցները: Դրանից հետո նախատեսվում էր մահափորձ իրականացնել Օբամայի դեմ և պետական հեղաշրջում իրականացնել:
Մեղադրյալները չեն թաքցնում իրենց բացասական վերաբերմունքը գործող նախագահի դեմ:
Դատախազությունը դեռ ճշգրիտ տվյալներ չունի ընդհատակյա խմբավորման կազմի մասին, որն իշխանությունները ահաբեկչական են համարում: Չի բացառվում, որ նրա կազմի մեջ են մտել և՛ ռազմական ծառայության մեջ գտնվող, և՛ զորացրված զինվորականներ:
