Վանաձորի մոտ 170 բազմաբնակարան շենքերի 60 անսարք վերելակների նորոգման համար քաղաքապետարանը թաղային համատիրություններին առաջարկում է օժանդակություն՝ ոչ ավելի, քան 500 հազար դրամի չափով:
Այս մասին «Առաջին լրատվական»-ի թղթակցի հետ զրույցում նշեց Վանաձորի քաղաքապետարանի համատիրությունների ու բնակարանային տնտեսությունների բաժնի պետ Գրիշա Պառավյանը:
«Մենք վերելակների նորոգման համար կատարվող աշխատանքների գումարի 50 տոկոսը տրամադրում ենք, բայց էդ գումարը չպետք է գերազանցի 500 հազարը: Օրինակ` եթե վերելակի նորոգումը արժեցել է 1 միլիոն դրամից ավելի, մենք կարող ենք տրամադրել միայն 500 հազար դրամ, մնացած գումարը պետք է տան համատիրությունն ու շենքի բնակիչները»,-ասաց նա:
Նշենք, որ համայնքի աջակցությամբ ու միջոցներով մինչ այս պահը վերանորոգվել են թվով 37 անսարք վերելակներ, բացի այդ` ևս 11 բազմաբնակարանների վերելակները նորոգվել են կառավարության տրամադրած ֆինանսական միջոցների հաշվին:
