Երեկ` օգոստոսի 27 –ին, վրաերթ է տեղի ունեցել Երևանում: Ժամը 23:40-ի սահմաններում Երևան քաղաքի Ռոստոմի փողոցի 96 տան բնակիչ 36-ամյա Ռոբերտ Գևորգյանը, վարելով «BMW 745» մակնիշի 01 ՕՍ 777 համարանիշի ավտոմեքենան, Իսակովի պողատայի թիվ 213 էլեկտրասյան դիմաց վրաերթի է ենթարկել հետիոտն, Իսակովի 24 տան բնակչ, 52-ամյա Վաչագան Հայրապետյանին:
Ֆոտոլրագրող Գագիկ Շամշյանը shamshyan.com-ին հայտնել է, որ վրաերթի ենթարկվածը մարմնական վնասվածքներով տեղափոխվել է Մալաթիա բժշկական կենտրոն, որտեղ, որոշ ժամանակ անց, մահացել է: Դեպքի վայրում հավաքվածները Գ. Շամշյանին պատմել են, որ վրարերթի ենթարկվածը երեկ նշում էր իր ծննդյան օրը և, գնումներ կատարելու նպատակով, խանութ գնալիս է եղել, իսկ «BMW 745»-ի վարորդը ԱԺ պատգամավոր, գեներալ-մայոր Սեյրան Սարոյանի թիկնազորի անդամ է:
Վրարեթի վայրում քննչական աշխատանքները ղեկավարել է Ոստիկանության քննչական գլխավոր վարչության, Երևանի քննչական վարչության Ճանապարհատրանսպորտային հանցագործությունների քննության բաժնի հատկապես կարևորագույն գործերով ավագ քննիչ Մանվել Մուրադյանը: Մ.Մուրադյանի հանձնարարականով` ավտոմեքենան տեղափոխվեց Ճանապարհային Ոստիկանության հատուկ պահպանման տարածք:
Փաստի առթիվ հարուցվել է քրեական գործ` ՀՀ քրեական օրենսգրքի 242 հոդվածի 2-րդ մասի (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) հատկանիշներով:
