«Հարսնաքարի» գործով նախաքննության ընթացքում հանցագործությունների շարքը սկսվեց տուժող կողմի նկատմամբ անհարգալից վերաբերմունքի դրսևորումներից: Հունիսի 17-ին «Հարսնաքար» ռեստորանային համալիրում տեղի ունեցածից միայն քառասուն օր հետո Վահե Ավետյանի իրավահաջորդ համարվեց Վահե Ավետյանի հայրը՝ Գառնիկ Ավետյանը: Այս մասին այսօր լրագրողների հետ հանդիպման ժամանակ ասաց «Վահե Ավետյան» հասարակական շարժման նախաձեռնող խմբի անդամ Գարեգին Չուքասզյանը՝ Վահե Ավետյանի դիակի դատաբժշկական փորձաքննության եզրակացությունը համարելով ակնհայտ կեղծ:
Ըստ նրա՝ նախաքննության ընթացքում շարունակվեց սպանության կոծկումը, որն ավարտվեց փաստաբաններին խանգարելով և անհաղթահարելի խոչընդոտներ ստեղծելով: Հասարակական ակտիվիստի խոսքով՝ սա ցինիզմով և համակարգային քաղաքականությամբ իրականացվող հանցագործություն է, որը նաև ցույց է տալիս հասարակության շրջանում արդարության ճգնաժամի խորությունը, որը, բանախոսի համոզմամբ, շատ վտանգավոր իրավիճակ է ստեղծում:
««Վահե Ավետյան» հասարակական շարժումը հայտարարում է ՀՀ-ում առկա արդարադատության ճգնաժամի, իրավապահ և արդարադատության մարմինների հանցավոր անգործության, համակարգված կերպով հանցագործությունները կոծկելու և հանրային արդարության տրիբունալի ստեղծելու անհրաժեշտության մասին: Իշխանական ներկայացուցիչների հանցագործությունների բացահայտումը, գործունեության վերահսկողությունը և նրանց գործողություններին իրավաքաղաքական գնահատական տալը կլինի այդ տրիբունայի գործը»,- նկատեց բանախոսը՝ հավելելով, որ տրիբունալի գործունեության մասին կխոսեն հավելյալ:
Նա իրավապահ, քննչական, դատաիրավական մարմինների ղեկավարներից պահանջեց անաչառ քննություն՝ հիշեցնելով, որ դիտավորյալ գործողություններով արդարադատությունը խաթարած պաշտոնյաներն օրենքի առջև անհատական պատասխանատվության կանչվելու հեռանկար առջև են:
Իր հերթին նույն շարժման անդամ, ՄԻ առաջին պաշտպան Լարիսա Ալավերդյանի խոսքով՝ չկա մեկը, որն ասի, թե վստահում է ՀՀ դատաիրավական համակարգին:
«Պետության գործառույթներից մեկը չի կատարվում դիտավորությամբ: Մենք գտնում ենք, որ Հայաստանում չկա վստահություն իշխանության լեգիտիմության, դատաիրավական, իրավապահ մարմինների նկատմամբ, ուստի կոչ ենք անում մասնագիտական ունակություն, մարդկային խիզախություն ունեցող մարդկանց ջատագով լինել հանրային արդարության տրիբունալ ստեղծելու գործին»,- նշեց Լարիսա Ալավերդյանը՝ ասելով, որ տրիբունալը հասարակությանը ներկայացնելու է տարբեր խնդրահարույց գործերին առնչվող իրական պատկերը:
