Այս տարի Արցախում barcamp-ի անցկացման մասին դեռ վերջնական որոշում չի ընդունվել: Ինչպես «Առաջին լրատվական»-ին հայտնեց Արցախում Տեղեկատվական տեխնոլոգիաների զարգացման կենտրոնի տնօրեն, Արցախում Barcamp-ի կազմակերպիչներից Վլադիմիր Գրիգորյանը, բավականին շատ կազմակերպչական և տեխնիկական խնդիրներ կան, որոնցից առաջինը ինտերնետի ապահովման խնդիրն է. «Անցած տարի որոշել էինք Քարվաճառի շրջանի Ծառ գյուղում, որն ամենաբարձրն է Արցախում՝ ծովի մակերևույթից 2100 մ բարձր, բայց տեխնիկական խնդիրներ կան, մեր տեղական պրովայդերները չեն կարող այդ բարձրության վրա ինտերնետ ապահովել: Մինչև օգոստոսի վերջը կորոշեմ`անել, թե չանել: Կաշխատեմ, իհարկե, անել, բայց վստահորեն չեմ կարող ասել»:
Նրա խոսքով՝ եթե միջոցառումն այս տարի կայանա, ապա որոշել են վրանային տարբերակով անել, հայտարարվելու է, որ նվազագույն հարմարություններ են լինելու, նաև մասնակիցներն անձամբ կհոգան իրենց ճանապարհածախսը:
Խոսելով barcamp-ի նշանակության մասին` Վ. Գրիգորյանը նշեց, որ առաջին միջոցառումից հետո Արցախի մասին մոտ 40 հզ. գրառումներ կային համացանցում, բնական է՝ դրական տեղեկություններ: «Պատկերացրեք՝ ինչ ահռելի տեղեկատվական հոսք էր համացանցում, որը մինչև հիմա շարունակվում է: Սա առաջին հերթին դիտարկում եմ տեղեկատվական պատերազմի շրջանակներում, որ չնչին գումարներ ենք ծախսում, բայց մեծ արդյունքի ենք հասնում: Շփումները նաև իրենց դրական ազդեցությունն են թողնում մասնակիցների վրա»,- ասաց Վ. Գրիգորյանը:
