Փետրվարի 19-ին Հայ Առաքելական Եկեղեցու Արցախի թեմի առաջնորդարանում, նախագահությամբ թեմակալ առաջնորդ Տ. Պարգև արքեպիսկոպոս Մարտիրոսյանի, տեղի ունեցավ թեմական խորհրդի նիստ: Նիստին իրենց մասնակցությունն էին բերել թեմական խորհրդի կազմում ընդգրկված ԼՂՀ նախագահ Բակո Սահակյանը, ԼՂՀ ԱԺ նախագահ Աշոտ Ղուլյանը, ՀՀ և ԼՂՀ Պաշտպանության նախարարներ Սեյրան Օհանյանն ու Մովսես Հակոբյանը, ինչպես նաև հոգևորականներ, պետական պաշտոնյաներ, գործարարներ:
Ժողովը բացվեց Տերունական աղոթքով, որից հետո Գերաշնորհ Պարգև Սրբազանը ժողովականներին ներկայացրեց նիստին քննարկվելիք հիմնական հարցերը:
Նախ ամփոփվեցին Գանձասարի Ս. Հովհաննես Մկրտիչ եկեղեցու 770-ամյակի տոնակատարությունների ծիրում կայացած միջոցառումների արդյունքները:
Ապա քննության առնվեցին ինչպես Ս. Զատկին ու Ցեղասպանության զոհերի հիշատակության օրը, այնպես էլ Արցախի Հանրապետության 20-ամյակի հոբելյանին Եկեղեցու և պետության համատեղ միջոցառումների ծրագրերը:
Լայն ուշադրության արժանացան Եկեղեցի-հասարակություն փոխհարաբերությունները, որոնց շարունակական ամրապնդումը Արցախի նախագահ Բակո Սահակյանը կարևորեց իբրև հասարակության ներդաշնակ զարգացման հիմքերից մեկը: Հատուկ ուշադրություն դարձվեց բանակ և Եկեղեցի կապերի ամրապնդման խնդրին:
Այնուհետև ժողովականներին ներկայացվեցին թեմի եկեղեցաշինական, քարոզչական ու հրատարակչական աշխատանքները և այլ հարցեր:
Ժողովը փակվեց Պարգև Սրբազանի «Պահպանիչ» աղոթքով:
