Կոալիցիոն նոր հուշագիր ստորագրած «Բարգավաճ Հայաստան» կուսակցությունը կարծես թե կամաց-կամաց սկսել է գիտակցել իր կատարած քայլի աղետալիությունը կուսակցության քաղաքական ապագայի տեսանկյունից: Այդ մասին էր վկայում ԲՀԿ նախագահ Գագիկ Ծառուկյանի մամուլի խոսնակ Խաչիկ Գալստյանի այսօրվա մամուլի ասուլիսը, որտեղ Գալստյանը մե՛կ փորձ էր անում կոալիցիոն նոր հուշագիր ներկայացնել որպես պետության փրկությանն ուղղված անձնվեր մի քայլ, մե՛կ էլ շարունակ հայտարարում էր, որ միայն ընտրողներն իրենք կորոշեն, թե որ կուսակցությունն ինչքան ձայն է հավաքում:
ԲՀԿ-ն ակնհայտորեն հայտնվել է երկվության մեջ: Բանն այն է, որ կոալիցիոն հուշագրում սևով սպիտակի վրա գրված է. «Նոր փոփոխություններին ընդառաջ` կոալիցիոն կուսակցությունները միասնական են և նպատակ չունեն գալիք խորհրդարանական ընտրություններում իրենց քաղաքական կշիռն ավելացնել միմյանց դեմ պայքար ծավալելու և կոալիցիայի ներսում ուժերի հարաբերակցությունը փոխելու հաշվին»:
Դա նշանակում է ոչ այլ ինչ, քան այն, որ, անկախ այն բանից, թե որ կուսակցությունն ինչքան ձայն կստանա, միևնույն է, ուժերի հարաբերակցությունը չի փոխվելու: Այսինքն՝ ՀՀԿ-ն լինելու է առաջինը, ԲՀԿ-ն՝ երկրորդը, իսկ ՕԵԿ-ն էլ՝ երրորդը: ԲՀԿ-ն ստորագրել է այդ դրույթի տակ:
Եվ այժմ, երբ ԲՀԿ նախագահի մամուլի խոսնակը հայտարարում է, որ ժողովրդի ձայնն է որոշելու՝ ով ինչքան տոկոս կստանա, դա արդեն առնվազն տարօրինակ է ու անտրամաբանական: Չէ՞ որ կոալիցիան արդեն ինքն իր համար որոշել ու ստորագրել է, թե որն է լինելու ուժերի հարաբերակցությունը:
Այդ պայմաններում Խաչիկ Գալստյանի հայտարարությունը հուշում է, որ ԲՀԿ-ն կա՛մ չի պատկերացրել, թե ինչի տակ է ստորագրել, կա՛մ էլ շատ լավ պատկերացրել է և հիմա նոր է սկսել հասկանալ, որ իրականում դա ոչ թե կոալիցիոն հուշագիր էր, այլ պարզապես սեփական դատավճիռ, որով «Բարգավաճ Հայաստանը» մեկընդմիշտ փակեց քաղաքականությամբ զբաղվելու, իրական քաղաքականությամբ զբաղվելու իր ճանապարհը:
Թեև, իհարկե, դեռ ուշ չէ, և դժվար է ասել, որ ամեն ինչ կորած է, քանի որ Խաչիկ Գալստյանի այսօրվա խոսքերը ժողովրդի ձայնի մասին, որ նա կրկնեց մի քանի անգամ, հուշում են, որ իրականում «Բարգավաճի» մեջ, այնուամենայնիվ, կա ներքին որոշակի ըմբոստություն, և այդ ըմբոստությունը որոշակի դրսևորումներ ունենում է:
Եվ եթե կոալիցիոն նոր հուշագրի ստորագրումից 3-4 օր անց ԲՀԿ-ն արդեն խոսում է ժողովրդի ձայնի մասին, ապա այդ դեպքում արդեն որքան էլ կանխատեսելի լինի ապագան, միևնույն է, շատ դժվար է ասել, թե 3-4 ամիս անց ինչի մասին և ինչ տոնով կխոսի «Բարգավաճ Հայաստանը»:
