Նախկին արտգործնախարար Վարդան Օսկանյանի քննադատությունը ներկայիս իշխանությունների վարած արտաքին քաղաքականությանը իշխանական պատգամավորների կողմից ընդունվեց փոխադարձ քննադատությամբ:
ԼՂ նախկին արտգործնախարար Արման Մելիքյանի կարծիքով, սխալներ եղել են թե՛ նախորդ տասը տարիների, թե՛ վերջին երեք տարիների ընթացքում. «Թե՛ պարոն Օսկանյանը, թե՛ ներկայիս գործող վարչակազմը, ըստ էության, համաձայն են եղել Մադրիդյան սկզբունքներին և այս տեսանկյունից նրանց միջև ես լուրջ տարբերություն չեմ տեսնում»:
Մելիքյանը հիշեցրեց, որ Մադրիդյան սկզբունքների և ընդհանրապես բանակցային գործընթացի տրամաբանությունը նախապատրաստվել և մշակվել է նաև Օսկանյանի մասնակցությամբ:
«Ներկայիս իշխանություններն իրենց քաղաքականությունը ժառանգել են նախորդ վարչակազմից, գուցե ինչ-որ նորամուծություններ կատարվել են, բայց տարածքների հարցում Հայաստանի դիրքորոշումը նախապատրաստված է եղել այն ժամանակ, Մադրիդյան սկզբունքներն էլ լույս աշխարհ բերվեցին մինչ նախագահական ընտրությունները»,- ասաց Մելիքյանը և հավելեց, որ պատասխանատվությունը մեկը մյուսի վրա գցելը էժանացնում է թե՛ նախորդ, թե՛ ներկայիս վարչակազմերի գործունեությունը: