Ֆրանսիական Auchan սուպերմարկետների ցանցը ֆրանչայզինգի պայմանագիր է ստորագրել հնդկական Max Hypermarket India Private Limited ընկերության հետ: Այս մասին ասվում է Auchan-ի տարածած մամլո հաղորդագրության մեջ:
Արդյուքնում` ֆրանսիական ընկերությունը ձեռք է բերել մուտքի իրավունք հնդկական շուկա: Պայմանագրի համաձայան՝ Max Hypermarket-ի խանութները անվանափոխվելու են՝ դառնալով Auchan: Բացի դրանից՝ կողմերը նախատեսում են առաջիկա տարում բացել 12-15 նոր խանութ`երկրի տարբեր մասերում:
Auchan-ը աշխարհի խոշորագույն առևտրային կազմակերպություններից է, այժմ այն գործում է 12 պետությունում: Անցյալ տարի Auchan-ի վաճառքների ծավալը կազմել է 44,4 միլիարդ եվրո:
Հնդկաստանում մանրածախ շուկայի շրջանառությունը գնահատվում է տարեկան 470 միլիարդ դոլար: Այս տարվա սկզբին երկրի իշխանությունները մեղմացրին օրենսդրական դաշտը: Ընթացիկ տարվա կեսերին Հնդկաստանում նոր խանութների բացման կամ հնդկական շուկայում ներդրումների մասին հայտնել են բազմաթիվ օտարերկրյա կազմակերպություններ, այդ թվում` IKEA-ն և Coca-Cola-ն: