Իսպանիայի առաջնության 24-րդ տուրում Մադրիդի «Ռեալ»-ը հեշտ հաղթանակ տարավ «Լևանտե»-ի նկատմամբ:
Վաղը Մոուրինյոյի սաները պետք է ուղևորվեն Ֆրանսիա, որտեղ երեքշաբթի օրը կանցկացնեն Չեմպիոնների լիգայի 1/8 եզրափակիչի առաջին հանդիպումը «Լիոն»-ի դեմ: Այդ պատճառով նրանց խնդիրն այս խաղում հաղթելն էր` հնարավորինս քիչ ուժեր ծախսելով: «Արքայական» ակումբը լուծեց իր առջև դրված խնդիրը և, հիմնականում, շուտ խփած գոլի շնորհիվ: Հանդիպման 6-րդ րոպեին Անխել Դի Մարիան շրջանցեց մրցակցի երեք պաշտպաններին և փոխանցում կատարեց դատարկ դարպասի առաջ միայնակ մնացած Քարիմ Բենզեմային, վերջինը չվրիպեց` 1:0: Այդուհետ «Ռեալ»-ը կրկին տիրում էր նախաձեռնությանը` մեկը մյուսի հետևից վտանգավոր պահեր ստեղծելով:
Մունուաի դարպասի մոտ: Մադրիդցիները, որպես կանոն հարվածային դիրք էին դուրս բերում թիմի գլխավոր ռմբարկու Ռոնալդուին, բայց այդ երեկո կարծես Մունուան իր առջև մեկ խնդիր դրած լիներ` Ռոնալդուից գնդակ չընդունել: 41-րդ րոպեին Պորտուգալացու տուգանայից կատարված հարվածից հետո նրա հայրենակից Ռիկարդո Կարվալիուն շեղ ընթացող գնդակն ուղղեց դեպի դարպասը` 2:0: Ամբողջ երկրորդ խաղակեսն անցավ նույն ոգով. Ռոնալդուն նվազագույնը 7 լավ հնարավորություն կորցրեց, իսկ մադրիդցիները համառորեն միայն նրան էին հարվածային դիրք դուրս բերում: Խաղն այդպես էլ ավարտվեց: «Ռեալ»-ը հաղթեց 2:0 հաշվով և այժմ բարձր տրամադրությամբ կմեկնի Ֆրանսիա: Բայց Մոուրինյոյի ու նրա թիմի տրամադրությունն էլ ավելի կբարձրանա, եթե այսօր «Ատլետիկ»-ի հետ խաղում «Բարսելոնա»-ն միավորներ կորցնի, ինչը բացառված չէ. թեկուզ` եթե հիշենք կատալոնացիների վերջին երկու հանդիպումները` ոչ-ոքի «Սպորտինգ»-ի հետ և պարտություն «Արսենալ»-ից:
Երեկ Իսպանիայի առաջնությունում ևս երկու հանդիպում կայացավ: Անցյալ տուրում «Բարսելոնա»-ի հետ ոչ-ոքի խաղալուց հետո, Խիխոնի «Սպորտինգ»-ն այս տուրում նույնպես անակնկալ մատուցեց: Մանոլո Պրեսիադոյի սաները կարողացան «Մեստալիա»-ում ոչ-ոքի ավարտել մրցաշարային աղյուսակի երրորդ հորիզոնականում ընթացող «Վալենսիա»-ի հետ հանդիպումը` «Վալենսիա»-«Սպորտինգ»` 0:0:
Մադրիդի «Ատլետիկո»-ն ընդհատեց 4 անընդմեջ պարտություններից բաղկացած անհաջող շարքը: Մայրաքաղաքի երկրորդ ակումբը հյուրընկալվելիս պարտության մատնեց «Սարագոսա»-ին: Հանդիպման միակ գնդակը 65-րդ րոպեին խփեց Սերխիո Ագուերոն: «Ատլետիկո»-ն այս հաղթանակից հետո վաստակած 33 միավորով բարձրացավ մրցաշարային աղյուսակի 7-րդ հորիզոնական:
