Այսօր Քուվեյթում էլ են սկսվել բախումներ: Այս երկրի դեպքում ոտքի են կանգնել բեդվինական ցեղերը, որոնք ավանդաբար վարում են քոչվոր կյանք:
Ըստ KUNA քուվեյթյան պետական գործակալության տվյալների` մոտ 50 հոգի ձերբակալվել են: Հայտնի է, որ բախումների հետևանքով վիրավորվել է մոտ 30 մարդ: Ըստ որոշ աղբյուրների` վիրավորվածներից 7-ը ոստիկանության աշխատակիցներ են:
Ալ-Ջահրա նահանգում, որը գտնվում է Քուվեյթի մայրաքաղաքից դեպի հյուսիս-արևմուտք, բողոքի ակցիայի դուրս եկած մոտ հազար բեդվիններ պահանջել են, որպեսզի իրենց տրամադրվի քաղաքացիություն, ապահովվեն աշխատանքով և անվճար կրթության ու բժշկական սպասարկման իրավունքով:
Այն, որ բախումները կտեղափոխվեն նաև Պարսից ծոցի նավթով հարուստ երկրներ, քիչ հավանական էր: Սակայն այդ տարածաշրջանում տեղի ունեցող հուզումների պատճառով Brent մակնիշի նավթն անցած շաբաթվա վերջին հասավ 104$/բարելի դիմաց: Իսկ հուզումները շարունակվելու դեպքում, նավթի գները կշարունակեն աճել:
