Եվրամիության անդամ պետությունների ղեկավարները որոշում են կայացրել փոփոխություններ մտցնել կազմակերպության հիմնարար փաստաթղթում` Լիսաբոնյան համաձայնագրում, այս մասին հայտնում է INTERFAX.RU գործակալությունը: Ըստ տեղեկատվության` նման անհրաժեշտություն է ծագել Եվրագոտու ֆինանսական կայունության ընդհանուր մեխանիզմներ ստեղծելու նպատակով: «Բրյուսելյան գագաթնաժողովի ընթացքում պետությունների ու կառավարությունների ղեկավարները համաձայնեցրել են տեքստը, որը պահանջում է խորհրդակցություններ անցկացնել պայմանագրում սահմանափակ փոփոխություններ կատարելու մասին», – հայտարարել է Եվրոպական խորհրդի նախագահ Հերման Վան Ռոմպեյը հրավիրված մամուլի ասուլիսի ժամանակ: Նրա խոսքերով, որոշումն ընդունվել է ֆինանսական եւ տնտեսական ճգնաժամերի, այդ թվում` Հունաստանում տեղի ունեցած ճգնաժամի դասերից հետո: Ռոմպեյը հայտարարել է, թե վերջնական որոշումն այս հարցում ընդունվելու է դեկտեմբերին կայանալիք ԵՄ գագաթնաժողովում, որպեսզի մինչ 2013թ. ավարտին հասցվեն նախատեսվելիք փոփոխությունները: Բանն այն է, որ Լիսաբոնյան համաձայնագիրը ներկայիս տեսքով չի թույլատրում անդամ երկրներին սեփական հարկատուների հաշվին փրկել պարտատու երկրներին: Փոփոխությունները անհրաժեշտ են Եվրագոտու բարեփոխման համար, ինչին ձգտում են Գերմանիան եւ Ֆրանսիան:
Հիշեցնենք, որ Լիսաբոնյան համաձայանգիրը կոչված էր փոխարինելու ԵՄ սահմանադրությանը` միջազգային ասպարեզում համաշխարհային կտրուկ ցնցումների ժամանակ կառույցի առավել արդյունավետ գործունեության նպատակով: Այն համաձայնեցվել էր 2007 թ. հոկտեմբերի 19-ին Լիսաբոնում կայացած միջկառավարական կոնֆերանսի ժամանակ: Հետագա երկու տարիների ընթացքում բարեփոխումների մասին նախագիծը վավերացվել է անդամ 27 պետություններում առանձին-առանձին, տեղի օրենսդրությունների համաձայն: