Բրիտանական հետախուզական ՄԻ-6 ծառայության ղեկավար Սոերսը հանդես է եկել մամլո ասուլիսով: Հիմնական թեման եղել են վերջերս մամուլում հայտնված այն տեղեկությունները, որոնց համաձայն` բրիտանական հետախուզական եւ հակահետախուզական ծառայությունները տեղեկություններ ստանալու իրենց մեթոդներում օգտագործում են նաեւ կտտանքները: Նա հայտարարել է, որ իր գերատեսչությունը միշտ կանգնում է երկընտրանքի առաջ` ինֆորմացիա ստանալու գործում:
«Կտտանքն անօրինական է եւ անընդունելի` ցանկացած իրավիճակում, եւ մենք այդ մեթոդի հետ ոչ մի առնչություն չունենք: Եթե մենք տեսնում ենք, որ մեր որոշակի գործողություններ կբերեն ինչ-որ մեկի դեմ կտտանքների կիրառմանը, ապա բրիտանական եւ միջազգային օրենքները նախատեսում են հրաժարվել դրանից, եթե նույնիսկ ահաբեկչության վտանգ կա»,- ասել է Սոերսը:
Իսկ սկանդալային հրապարակումները հայտնվել էին այն բանից հետո, երբ հայտնի էին դարձել որոշ մանրամասներ «Գուանտանամոյի» բանտում կիրառվող մեթոդների մասին:
Սոերսը նաեւ կոչ է արել անընդհատ չստիպել գաղտնիքներ բացահայտել. «Գաղտնիությունը վիրավորական բառ չէ, դա թաքցնելու հոմանիշը չէ: Գաղտնիությունը առանցքային դերակատարում ունի Բրիտանիայի անվտանգության եւ կայունության ապահովման համար»:
