Իրանական IRNA լրատվական գործակալությանը տված հարցազրույցի ժամանակ Իրանի՝ Ասիայի ու Խաղաղօվկիանոսյան երկրների գծով փոխարտգործնախարար Աբբաս Արագչին անդրադարձել է Ղարաբաղյան հակամարտության կարգավորմանը.
«Իրանը Հայաստանի ու Ադրբեջանի բարձրաստիճան ներկայացուցիչների հետ բարձր մակարդակով ունեցած հանդիպումների ժամանակ պատրաստակամություն է հայտնել աջակցել Ղարաբաղյան հակամարտության խաղաղ կարգավորման գործընթացին: Հայաստանի ու Ադրբեջանի հետ ընդհանուր սահման ունեցող Իրանին, բնականաբար, մտահոգում է հայ-ադրբեջանական շփման գծի լարվածությունը:
Իրանին մտահոգում է նաև Ադրբեջանի ու Իսրայելի միջև ռազմական համագործակցությունը: Մենք մեր լուրջ մտահոգությունն ենք հայտնել ադրբեջանական կողմին, ով վստահեցրել է, որ դա ուղղված չէ Իրանի դեմ: Ներկայումս մենք լրջորեն ուսումնասիրում ենք նաև Ադրբեջանում ամերիկյան ռադարների տեղակայման հարցը: Եթե մենք զգանք, որ այդ լուրերը լուրջ են, ապա մենք այդ մասին կհայտարարենք ադրբեջանական կողմին»: