Голос России ռադիոկայանին տված հարցազրույցի ժամանակ Ռուսաստանի փոխարտգործնախարար Գրիգորի Կարասինն անդրադարձել է Ղարաբաղյան հակամարտության կարգավորմանը.
«Դա չափազանց բարդ, խճճված թեմա է, որն ունի իր արմատները, իր պատմությունը: Թե՛ Հայաստանը, թե՛ Ադրբեջանը հանդիսանում են ԱՊՀ-ի գծով մեր մոտ գործընկերները: Մենք թանկ ենք գնահատում մեր հարաբերությունները և՛ Երևանի, և՛ Բաքվի հետ: Արդարացի ու ազնիվ ձևով անում ենք ամեն հնարավոր բան՝ մերձեցնելու Լեռնային Ղարաբաղի շուրջ երկու կողմերի դիրքորոշումները:
Ղարաբաղյան հակամարտության կարգավորմամբ զբաղվում է ԵԱՀԿ Մինսկի խումբը, որում ներառված են Ռուսաստանի, ԱՄՆ-ի, Ֆրանսիայի համանախագահներն ու ներկայացուցիչները, ԵԱՀԿ-ի ներկայացուցիչները, որոնք բարեխղճորեն կատարում են իրենց աշխատանքը, ժամանում են տարածաշրջան, հանդիպումներ են ունենում Հայաստանի ու Ադրբեջանի առաջնորդների հետ, օգնում են նրանց գտնել ապագա փաստաթղթերի համար ընդունելի ձևակերպումներ:
Մենք ամեն կերպ աջակցում ենք այդ գործունեությանը և հուսով ենք, որ 2012-2013 թվականներին առաջընթաց կգրանցվի բանակցային գործընթացում»:
