Արդեն երկար ժամանակ Սիրիայում շարունակվող լայնածավալ գործողությունները, բախումներն ընդդիմության և երկրի իշխանության միջև անմասն չթողեցին նաև Սիրիայի առևտրաարդյունաբերական կենտրոն հանդիսացող Հալեպի կենտրոնը:
Այսօր արևածագին մոտ զինյալ ընդդիմադիրները, հատկապես կրոնական արմատական ուղղություններին պատկանող զինյալները, հասել էին Հալեպի կենտրոն` հայաշատ թաղամասեր՝ փորձելով հարձակվել զինվորական կենտրոններից մեկի վրա: Մի քանի ժամ պետության բանակի և ընդդիմության բախումներից հետո պետությունն ի վերջո իր օդուժի և հրետանու միջոցով գրոհայիններին հետ է մղել: Այս պահին Հալեպում իրավիճակի տերն իշխանությունն է:
«Առաջին լրատվական»-ի հետ զրույցում տեղեկացրեց Հալեպում Բերիո թեմի Ազգային առաջնորդարանի մամուլի քարտուղար Ժիրայր Ռեիսյանը` հավելելով, որ սա դեռևս չի նշանակում, որ վտանգ չկա:
Ըստ Ժ. Ռեիսյանի`հնարավոր է, որ Հալեպի կենտրոնում զինյալները պահ մտած լինեն և ամեն պահի սրեն իրավիճակը, այնպես որ մարդիկ շատ զգուշավոր են, իրենց բնակարաններից դուրս չեն գալիս, խուճապ չկա, բայց անապահով վիճակ է:
Նրա խոսքով՝ բախումների արդյունքում ապակիների մնացորդներից, պայթյուններից, ինքնաշարժերի գործունեությունից վիրավորներ կան, սակայն յուրաքանչյուր իրավիճակում ժողովուրդը պայմաններին է հարմարվում և այդ դժվարությունների լուծումն է գտնում:
Ժիրայր Ռեիսյանը նաև տեղեկացրեց, որ ցերեկը կրակոցներ էին լսվում Հալեպում, սակայն արևածագին իրավիճակը շատ ավելի վտանգավոր էր:
Նա նշեց, որ զինյալները բախումների մեկնարկի առաջին իսկ օրից փորձում են կառավարության շենքեր մուտք գործել, մեծամասամբ նրանց թիրախում են ապահովական և զինվորական կենտրոնները` ոստիկանանները, պաշտպանության կենտրոնները: Բայց, ըստ Ռեիսյանի, կառավարական բանակը միշտ կարողացել է վերահսկել իրավիճակը և հետ մղել գրոհայիններին:
«Սակայն սկզբում այդ գործողությունները Հալեպի արվարձաններում էին, իսկ այսօր նաև Հալեպի կենտրոնում, որը մտահոգիչ է»,- նկատեց սիրիահայը` հույս հայտնելով, որ Հալեպի կենտրոնում առաջիկա ժամերին իրավիճակը կկարգավորվի:
Անդրադառնալով տեղեկություններին, թե բախումների արդյուքնում երկու հայ է զոհվել` հստակեցրեց, որ այդ հայերը, ոչ սիրիական բանակի ծառայող լինելով, ինքնակամ գնացել և ի նպաստ պետության գործողություններին էին մասնակցում, փորձում բախումներին օգտակար լինել:
