Շիրակի մարզի Արթիկ քաղաքում սեպտեմբերի 9-ին կկայանան ՏԻՄ ընտրությունները: ՀԱԿ Արթիկի կառույցը թեկնածու չի առաջադրելու համայնքի ղեկավարի ընտրություններում: Այս մասին «Առաջին լրատվական»-ի հետ զրույցում ասաց ՀԱԿ Արթիկի կառույցի ղեկավար Գոռ Աթոյանը` խոսելով Արթիկում ՏԻՄ ընտրությունների շուրջ:
Նրա խոսքով` ՀԱԿ-ն Արթիկում համայնքի ղեկավարի համար թեկնածու չունի, իսկ ավագանու ընտրություններին երեք հոգի մասնակցելու են:
Հարցին, թե համայնքի ղեկավարի ընտրություններին ո՞ր կուսակցության թեկնածուին են սատարելու, Գոռ Աթոյանը պատասխանեց, որ դեռ որոշում չկա, որ կուսակցության թեկնածուին են սատարելու: Ըստ նրա` որոշում կկայացնեն, երբ վերջնական թեկնածուների գրանցումները պատրաստ լինեն:
«Մենք ավելի ճիշտ նայում ենք, թե որպես արթիկցի ովքեր են առաջադրված, համայնքը փոքր է, մենք նայում ենք որպես քաղաքացի, ոչ թե որպես կուսակցական, բայց կուսակցական պատկանելության շուրջ ևս մտածելու ենք: Նախ կտեսնենք՝ ովքեր կառաջադրվեն, նոր կորոշենք: Չեմ բացառում, որ որոշում կայացնենք ոչ մեկին չսատարել»,- պարզաբանեց Գոռ Աթոյանը` հավելելով, որ ՀԱԿ կենտրոնական գրասենյակի որոշումները սրբությամբ կատարում են, բայց այս պարագայում մի քիչ կնայեն իրենց որոշմանը ևս, որովհետև սա համայնքի գործ է, համապետական ընտրություն չէ, տեղական ընտրություն է, կառույցը չի կարող գիտենալ` Արթիկում ով ինչպես կարող է լինել:
Նա նաև նկատեց, որ Հանրապետական թեկնածուին չեն ցանկանում սատարել, բայց նայած թե ով կդնի իր թեկնածությունը, կարևոր է, թե ով է Արթիկի համար:
Հիշեցնենք, որ մինչև օգոստոսի 10-ը պարզ կլինեն առաջադրումները:
