Microsoft կորպորացիան հրաժարվում է կիրառել սենսորային կառավարմամբ նոր ինտերֆեյսի Metro բրենդը: Այս մասին հաղորդում է The Verge տեխնոբլոգը՝ հղում անելով ընկերության հայտարարությունը:
Նոր գրաֆիկական ինտերֆեյսը պետք է միավորի Microsoft կորպորացիայի տարբեր ծրագրային և ապարատային պլատֆորմները՝ ցանկացած չափի դիսփլեյի համար՝ լինի բջջային հեռախոս, պլանշետ, հեռուստացույց, թե անձնական համակարգիչ:
Ինտերֆեյսը, որը հիմնված է ինտերակտիվ տարրերի մատրիցայի վրա, գործարկվել է դեռ անցած տարի Windows Phone բջջային պլատֆորմի վրա: Այն կդառնա նոր՝ Windows 8 օպերացիոն համակարգի գլխավոր տարրը: Օպերացիոն համակարգը օգտատերերին հասանելի կլինի հոկտեմբերի 26-ին:
Սակայն Microsoft-ը հրաժարվում է Metro բրենդային անվանումից: Հիշեցնենք, որ նոր Office ծրագրային փաթեթի ներկայացումից առաջ ընկերության գլխավոր տնօրեն Ստիվ Բալմերը չի կիրառել Metro բառը՝ նկարագրելու ինտերֆեյսի դիզայնը, այլ օգտագործել Windows 8 Design Style անվանումը:
«Մենք Metro-ն կիրառել ենք որպես ծածկանուն՝ շղթայական արտադրական մշակման գործընթացի ժամանակ: Եվ քանի որ արդեն մոտենում ենք թողարկման և սպառողների հետ ինդուստրիալ երկխոսությանը, պետք է օգտագործենք մեր արտադրանքների կոմերցիոն անվանումը»,- հայտնել են Microsoft-ի ներկայացուցիչները Mashable տեխնոբլոգին:
Աղբյուրի տվյալներով՝ Microsoft-ը նման որոշում է կայացրել եվրոպական շուկայի անանուն գործընկերների հետ բանակցություններից հետո: Ընկերությունն արդեն աշխատում է Metro անվանմանը փոխարինող գտնելու ուղղությամբ:
Mashable.com-ի փոխանցմամբ՝ Metro-ի ամենահավանական կոմերցիոն անվանումը կլինի Windows Design Style:
