«Ես դժվարանում եմ ասել, թե վճռական գործողություններ ասելով` ինչ նկատի ունեն համանախագահները, ես կցանկանայի, որ համանախագահները բացեին իրենց այդ արտահայտության իմաստը»,- անդրադառնալով ԵԱՀԿ Մինսկի խմբի համանախագահների տարածաշրջան կատարած այցելությունից հետո արած հայտարարությանը, «Առաջին լրատվականի» հետ զրույցում կարծիք հայտնեց ԱԺ ԲՀԿ խմբակցության պատգամավոր Նաիրա Զոհրաբյանը:
Զոհրաբյանի գնահատմամբ, իրոք, հասունացել է այն պահը, որպեսզի համանախագահները հստակ արձագանքեն Ադրբեջանի ոչ կառուցողական գործողություններին, Ադրբեջանի քաղաքական էլիտայի առաջին դեմքերի ռազմատենչ հայտարարություններին:
«Նույն համանախագահները հայտարարում են, թե ԼՂ խնդիրն ունի բացառապես խաղաղ կարգավորում, և դրան զուգահեռ հնչում է Ադրբեջանի պաշտպանության նախարարի հայտարարությունը, թե իրենց ռազմական բյուջեն գերազանցում է Հայաստանի ողջ բյուջեն, Ալիևն ամեն օր սպառնում է պատերազմով: Այդ ամենը չի արժանանում համանախագահների համապատասխան արձագանքին: Եկել է պահը, որպեսզի համանախագահներն ավելի հասցեական լինեն իրենց հայտարարություններում և զերծ մնալով ընդհանուր ձևակերպումներից` կոնկրետ նշեն, թե որ կողմն է խախտում խաղի կանոնները»,- նշեց Զոհրաբյանը:
Զոհրաբյանի գնահատմամբ, եկել է պահը կոչելու իրերն իրենց անուններով: