«Իսկ դուք ինձ չե՞ք տեսել Մաշտոցի պուրակում… Նստացույց իրականացնող կանանց վարդեր էի բաժանում…»,- ասաց ԲՀԿ մամլո խոսնակ Տիգրան Ուրիխանյանը` ի պատասխան «Առաջին լրատվական»-ի հարցին, թե ԲՀԿ-ն չի՞ պատրաստվում միանալ քրեաօլիգարխիկ տարրի դեմ պայքար ծավալած քաղաքացիական նախաձեռնությանը: Մեր հիշեցմանը, որ իզուր էր ծաղիկներ բաժանում, քանի որ Սերժ Սարգսյանը «մի հարվածով» լուծեց Մաշտոցի պուրակի խնդիրը, և որ հարցը «Հարսնաքարում» պատահած ոճրագործությունից հետո ծավալված քաղաքացիական նախաձեռնության մասին է, ԲՀԿ մամլո խոսնակը պատասխանեց.
«ԲՀԿ-ն` որպես ցենտրիստական քաղաքական կազմակերպություն, ունի հստակ համոզմունք` քաղաքացիական ակտիվությունը միանշանակ կարեւոր նախապայման է ցանկացած պետության զարգացման գործում, առավել եւս` նմանատիպ խնդիրների դեպքում: Կուսակցությունը պատրաստ է ցանկացած զանգվածային արտահայտման դեպքում կանգնել մասնակիցների կողքին, անշո՛ւշտ»:
Մեր այն հարցին, թե եթե ԲՀԿ-ն պատրաստ է կանգնել քրեաօլիգարխիկ տարրի դեմ իրականացվող պայքարին, ապա ի՞նչ է կարծում Տիգրան Ուրիխանյանը, կուսակցության առաջնորդ Գագիկ Ծառուկյանը օլիգա՞րխ է, ԲՀԿ մամլո խոսնակն ասաց.
– Դուք ի՞նչ եք կարծում, դա այն հարցն է, որին արժե, որ ես պատասխանե՞մ:
– Այո՛, այդ հարցին հենց դուք պետք է պատասխանեք:
– Դե, ուրեմն, խորհուրդ եմ տալիս բացել բառարանները, կարդալ և իմանալ, թե որն է օլիգարխը: Բառի բառարանային բացատրությունը հակասում է այն կերպարին, այն պաշտոնական գործողություններին, որոնք իրականացնում է տվյալ անձնավորությունը:
– Պարո՛ն Ուրիխանյան, Դուք պնդում եք, որ Գագիկ Ծառուկյանն օլիգարխ չէ՞:
– Այո՛, ես պնդում եմ, որ Գագիկ Ծառուկյանը օլիգարխ չէ:
