Արցախի նախագահական ընտրություններում պարտություն կրած նախագահի թեկնածու Վիտալի Բալասանյանը երեկ հանդես եկավ քաղաքական նոր ուժի ստեղծման մասին հայտարարությամբ: Նախագահական ընտրությունների նախաշեմին և դրանից հետո Վիտալի Բալասանյանը հայտարարել էր, որ պատրաստվում է համախմբել ընդդիմադիր դաշտը: Եվ ահա գործնական քայլերը չուշացան:
«Նախընտրական քարոզարշավի ժամանակ մեր շատ քաղաքացիներ խնդիր են դրել ցանկացած արդյունքի դեպքում ձևավորել քաղաքական ուժ և շարունակել պայքարը: Այսօր արդեն այդ պահն է: Ժամանակն է ստեղծել ինստիտուցիոնալ կառույց, որը քաղաքական եղանակներով կփորձի հարցերի լուծումներ տալ: Արդեն իսկ պատրաստ է հիմնարար սկզբունքների նախնական տարբերակը, որը լայնորեն քննարկվելուց, լրացվելուց և խմբագրվելուց հետո հիմք կհանդիսանա ժողովրդի լայն շրջանակների համախմբման` հանուն ազգային-հոգևոր արժեհամակարգի պահպանության և այդ հիմքի վրա զարգացման համար»,- մասնավորապես նշված է Բալասանյանի տարածած հայտարարության մեջ:
Վիտալի Բալասանյանը նաև տեղեկացրել է, որ շուտով ինքն ու իր գաղափարակիցները հանդիպումներ են ունենալու Արցախի տարբեր համայնքներում` համառոտ ներկայացնելու նոր ստեղծվելիք կառույցի հիմնարար սկզբունքները, համալրելու դրանք՝ հավաքելով նոր առաջարկներ հասարակության լայն շրջանակներից:
Հայտարարության մեջ նաև նշված է, որ իշխանությունների վարած քաղաքականության հետևանքով Արցախի ժողովուրդն այսօր չունի այն, ինչի համար պայքարել է և ինչի համար իրենց կյանքն էին զոհել մարդիկ. «Ստեղծված հոռի բարքերի, կոռուպցիայի և անարդյունավետ կառավարման պատճառով այսօր ազգային հարստության մեծ մասը հայտնվել է մի խումբ մարդկանց ձեռքին: Մեր նպատակը սոցիալական արդարության հաստատումն է, ազգային հարստությունը բոլորին հասանելի դարձնելը: Ժամանակն է վերաիմաստավորել քսանամյա պետականաշինության մեր ճանապարհը, գնահատական տալ անցած ուղուն: Նոր վերածննդի անհրաժեշտություն կա, ինչը թույլ կտա վերգտնել արցախյան շարժման ժամանակ եղած մթնոլորտը, հասարակության առողջ բարոյահոգեբանական վիճակը»:
Երեկ Վիտալի Բալասանյանը պատասխանեց «Առաջին լրատվական»-ի հարցերին:
– Պարոն Բալասանյան, որքանո՞վ ընդդիմադիր ուժի աշխատանքն արդարացված կլինի Արցախում:
– Ղարաբաղում պետք է, որ միշտ լինի ընդդիմություն: Մենք ունենք համապատասխան ծրագրեր: Մենք հո ամեն օր չե՞նք բողոքելու, ասենք՝ էս լավ չի, կամ էս վատ ա և այլն: Մենք ներկայացրել ենք բացթողումները, քննադատել ենք իշխանության թե’ արտաքին քաղաքականության, թե’ սոցիալ-տնտեսական ծրագրերը և ունենք մեր ծրագրերը, այսինքն՝ լուծման ուղիները: Մենք պատրաստ ենք օգնել մեր երկրի զարգացմանը՝ թե’ սոցիալ-տնտեսական, թե’ պաշտպանության, թե’ արտաքին քաղաքականության հարցերում:
– Իսկ հնարավո՞ր է՝ Ձեր ուժը արտահերթ ընտրությունների անցկացման նախաձեռնությամբ հանդես գա:
– Դրա անհրաժեշտությունը եթե լինի, իհարկե, չի բացառվում, որ կարող է և Ազգային ժողովի արտահերթ ընտրություններ լինեն: Դա արդեն ընթացքում կորոշվի, հիմա չենք կարող ասել: Լեռնային Ղարաբաղն այսօր ունի պրոբլեմ արտաքին քաղաքականության հարցում, և մեր Ազգային ժողովը շատ թույլ է: Դա լուրջ վնաս է երկրի համար:
– Ի՞նչ եք կարծում` երկրում ընդդիմադիր ուժի ստեղծումը չի՞ վտանգի բանակցային գործընթացը:
– Հակառակը կլինի, քանի որ մշտապես իշխանություններն արտաքին քաղաքականությամբ զբաղվել են այնքանով, որքանով: Եվ մենք դուրս ենք մնացել բանակցային գործընթացից մի պարզ պատճառով՝ անգործունակ են ճանաչվել իշխանությունները, և երկրորդ՝ չունենք ընդդիմություն, որը պիտի ստիպի իշխանություններին արտաքին քաղաքականություն վարել: Հակառակը կասեի ես՝ եթե Ղարաբաղն ընդդիմություն ունենա, ամբողջ աշխարհը, միջազգային հանրությունը հաշվի կնստեն Արցախի թե’ ընդդիմության, թե’ իշխանությունների, թե’ ժողովրդի հետ: Հիմա կա այնպիսի մի փաթեթ, ինչպիսին է Մադրիդյան սկզբունքների փաթեթը, որը գաղտնի է վարվում, որևէ մեկը տեղյակ չէ դրա մասին: Համոզված եմ, որ սրանից հետո որևէ բանակցային փաստաթուղթ, որը պետք է քննարկվի բանակցային գործընթացի ժամանակ, ապա դրա մասին առանց բացառության տեղյակ են պահելու Լեռնային Ղարաբաղի Հանրապետության բնակչությանը:
– Այսինքն, ըստ Ձեզ, Ձեր ուժը կօգնի, որպեսզի Ղարաբաղը ներգրավվի բանակցային գործընթացի՞ն:
– Այո’, միանշանակ: Դա և’ Ղարաբաղի իշխանություններին է պետք, և’ ընդդիմությանը, և’ ժողովրդին: Մեզ պարտադրվել է պատերազմ, միջազգային հանրությունը թող գնահատական տա պատերազմին: Դրանից հետո արդեն Ղարաբաղը կմասնակցի բանակցային գործընթացին, թե ոչ` դա երկրորդական է: Նախ պետք է գնահատական տրվի:
– Առաջնայինը գնահատական տա՞լն է:
– Այո’, պետք է գնահատական տալ պատերազմին, այնուհետև ճանաչել Ղարաբաղը որպես հակամարտող կողմ և ապա ներգրավել բանակցային գործընթացին որպես լիիրավ անդամ: Իսկ Հայաստանի Հանրապետությունը պետք է հանդիսանա Լեռնային Ղարաբաղի Հանրապետության բնակչության անվտանգության պաշտպանության և տարածքային ամբողջականության երաշխավորը:
