Հայ օրենսդիրներին «Խղճի ու կրոնի ազատության մասին» օրինագծի թերությունները շտկելու հարցում օգնելու նպատակով Երևանում է Վենետիկի հանձնաժողովի պատվիրակությունը` Ֆինոլա Ֆլենեգանի և Քարոլին Մարտինի գլխավորությամբ: Պատվիրակները այսօր մասնակցեցին օրենքի կլոր սեղան քննարկմանը:
Հիշեցնենք, որ Վենետիկի հանձնաժողովը, դեկտեմբերի 10-ի նիստում քննելով «Խղճի ու կրոնի ազատության մասին» ՀՀ օրենքում փոփոխություններ կատարելու մասին օրինագիծը, հայտարարել է, որ այն անընդունելի է և վերանայման կարիք ունի:
Հանձնաժողովն անընդունելի է համարում օրինագծի հետևյալ կետերը` հոգեորսության սահմանումը, կրոնական կազմակերպությունների մասին կետը (օրենքում դրանց թիվը սահմանափակված է 200) և կրոնական կրթության մասին իրավունքի սահմանումը:
Այսօր կազմակերպված կլոր սեղան քննարկմանը մասնակցեց նաև արդարադատության նախարար Հրայր Թովմասյանը: «Առաջին թերությունը հոգեորսության սահմանումն է: Պետք է նշենք արգելված գործողությունները, բայց զերծ մնանք սահմանումներից, որոնք միշտ խոցելի են»,- ասաց Թովմասյանը:
Նախարարը նաև պատրաստակամություն հայտնեց համագործակցել միջազգային փորձագետների հետ և նոր օրինագիծ մշակել, որը կուղարկվի Վենետիկի վեհաժողով և կտեղադրվի նախարարության պաշտոնական կայքում: