Քիչ առաջ նախագահական նստավայրի մոտ մեկնարկեց ակցիաʽ ի պաշտպանություն ՀԱԿ ակտիվիստների և ազատազրկված ՀԱԿ ակտիվիստ Տիգրան Առաքելյանի: Ինչպես իր խոսքում նշեց հրապարակախոս ՀԱԿ ներկայացուցիչ Զառա Հովհաննիսյանը, ՀԱԿ ակտիվիստների վերաբերյալ կայացրած վճիռը ուղղորդված է Բաղրամյան 26-ից, որն իրենք որակում են որպես խայտառակություն: Նա նշեց, որ իրենց պահանջն է արդարացնել ՀԱԿ ակտիվիստներին, ազատ արձակել Տիգրան Առաքելյանին, կարճել մյուս ակտիվիստների նկատմամբ հարուցված քրեական գործը և պատժել երիտասարդների դեմ կեղծ ցուցմունք տված ոստիկաններին: Զառա Հովհաննիսյանն իր խոսքն ավարտեց` բոլորին կոչ անելով միանալ պայքարին:
ՀԱԿ համակարգող Լևոն Զուրաբյանը իր խոսքում հիշեց, որ այսօր ՀԱԿ ձևավորման 4-րդ տարեդարձն է: «Մենք պետք է ինչ որ կերպ նշեինք ՀԱԿ-ի ծնունդը: Այսօր մենք տարեդարձը պայքարով ենք նշում և պայքարելու ենք մինչև վերջ, պայքարելու ենք ժողովրդական ամնակարևոր ազատությունների համար և դրա համար պատրաստ ենք նստել բանտ, իսկ դա ապացուցել ենք մեր 4 տարվա պայքարով»,-նշեց Զուրաբյանը` հավելելով, որ գործող ռեժիմին քիչ է մնացել, և բռնապետության օրերը հաշված են:
Այս պահին նախագահական նստավայրի դիմացի մայթին հավաքված են 50-ից ավելի ակտիվիստներ, տարբեր պաստառներով` «Ազատությունը ես եմ», «Չենք հանդուրժի», «Ազատություն քաղբանտարկյալներին», իսկ ակտիվիստներից մեկը ձեռքին ունի մեծ պաստառ` շղթայված Սերժ Սարգսյանը:
