Համազգային թատրոնի շենքը Գլխավոր պողոտայում կառուցելու վերաբերյալ խոսակցությունները վրդովեցրել են ճարտարապետական հանրությանը: Հայաստանի վաստակաշատ ճարտարապետներն ասում են, որ Երևանի Գլխավոր հատակագծով Գլխավոր պողոտան կառուցապատման ենթակա չէ: Այնինչ նախորդ տարիներին և Գլխավոր Պողոտայում, և Հյուսիսային պողոտայում բարձրահարկ շինություններ կառուցվեցին, աղավաղվեց Երևանի ճարտարապետական տեսքը:
Ճարտարապետների միությունում այսօր քննարկվում էր խնդիրը: Ճարտարապետների միության անդամներին վրդովեցրել է այն, որ թատերագետները հարցը քննարկելիս իրենց չեն հրավիրել: Նախագծի հեղինակը ճարտարապետ Հրաչ Պողոսյանն է, սակայն Երևանի կենտրոնում «հրեշավոր» քաղաքաշինական ծրագրեր իրագործելու մեջ վաստակաշատ ճարտարապետները մեղադրում են Երևանի գլխավոր ճարտարապետ Նարեկ Սարգսյանին:
Ճարտարապետ Սաշուր Քալաշյանի խոսքով՝ Երևանի Գլխավոր հատակագծով այդ տարածքը հայտարարված է հանրային օգտագործման տարածք: Իսկ հանրային օգտագործման տարածքը կառուցապատման ենթակա չէ: Թեև թատրոնն էլ է հանրային օջախ, սակայն այս դեպքում քաղաքաշինական օբյեկտ է համարվում:
Ճարտարապետներին մտահոգում է այն, որ Նարեկ Սարգսյանի այս նախաձեռնության պատճառով թատերական համայնքը դուրս է եկել իրենց դեմ, իսկ Համազգային թատրոնի գեղարվեստական ղեկավար Սոս Սարգսյանն իրենցից վիրավորվել է:
