Թուրքիայի ազգային անվտանգության խորհուրդը հավանություն է տվել անվտանգության նոր ռազմավարությանը՝ առաջին անգամ դրա մեջ, որպես երկրի համար հիմնական սպառնալիքներից մեկը, մտցնելով կիբեռսպառնալիքը, այդ մասին հաղորդել են միջազգային գործակալությունները: Անվտանգության նոր ռազմավարությունը կամ «Կարմիր գիրքը», ինչպես անվանում են Թուրքիայի ազգային անվտանգության բնագավառում քաղաքականության վերաբերյալ քաղաքական փաստաթուղթը, քննարկվել է երկրի անվտանգության խորհրդի՝ չորեքշաբթի կայացած նիստում: Այժմ այն պետք է հաստատի կառավարությունը: Անվտանգության նոր ռազմավարության մանրամասները չեն հրապարակվում, միեւնույն ժամանակ, ինչպես նշում են տեղական ԶԼՄ-ները, ծրագրվում էր «Կարմիր գրքում» «ամենաարմատական փոփոխությունները կատարել «սառը պատերազմի» ժամանակներից ի վեր»: Մասնավորապես, Թայիփ Էրդողանի կառավարության կողմից իրականացվող «հարեւանների հետ զրոյական խնդիրների» քաղաքականության շնորհիվ նախատեսվում էր որպես «հիմնական արտաքին սպառնալիքներ» դրանից բացառել Ռուսաստանը, Իրանը եւ Իրաքը, որոնց հետ Անկարան սերտորեն համագործակցում է վերջին տարիներին:
«Կարմիր գիրքը» ավանդաբար պատրաստվում Է Թուրքիայի գլխավոր շտաբի կողմից եւ վերջնական տեսքի բերվում երկրի ազգային անվտանգության խորհրդի հավանությանն արժանանալուց հետո: Նախորդ անգամ այն հաստատվել Էր 2005թ. հոկտեմբերին, երբ Թուրքիան ԵՄ-ի հետ բանակցություններ սկսեց այդ կազմակերպությանը որպես լիիրավ անդամ միանալու համար:
