Կառավարության այսօրվա նիստում հաստատվեց «Գարու արտադրության զարգացման» ծրագիրը, որի նպատակն է Հայաստանում գարու ցանքատարածությունների և համախառն բերքի ավելացումը: Նախատեսվում է Ուկրաինայից Հայաստան ներմուծել 2,000 տոննա առաջին դասի գարու սերմնացու և տրամադրել հողօգտագործողներին պետական աջակցության տեսքով:
«Այս 2000 տոննա սերմնացուն տրամադրելու ենք որպես սոցիալական փաթեթ: Առաջին հերթին գյուղնախարարությունը բացահայտել է այն տնտեսությունները, որոնք օժանդակության կարիք ունեն և մենք նրանց անվճար տրամադրելու ենք բարձր որակի սերմնացու, որը ներկրելու ենք Ուկրաինայից և Ռուսաստանից: Այս պահի դրությամբ շուրջ 14 հազար տնտեսություն ստանալու է օժանդակություն, նպատակն է ընդլայնել մշակվող հողատարածքների ծավալը:
Գաղտնիք չէ, որ տարիներ շարունակ կրճատվում է մշակվող հողատարածությունների ծավալը: Սա ունի նաև հստակ սոցիալական ուղղվածություն: Չեմ բացառում, որ եթե տեսնենք` պահանջարկը շատ ավելի մեծ է, քան 2,000 տոննան, ևս 1,000 տոննայի սերմնացու ներմուծենք»,- հայտարարեց վարչապետ Տիգրան Սարգսյանը:
