Հանքավայրերի շահագործումը սահմանափակող փաստաթուղթ չկա: Այս մասին «Առաջին լրատվական»-ի հետ զրույցում ասաց «Էկոլուր» հասարակական դաշինքի ղեկավար, բնապահպան Ինգա Զառաֆյանը:
Նրա խոսքով` չկա որևէ միջազգային բնապահպանական փաստաթուղթ կամ սահմանում, ըստ որի՝ փոքր տարածքում չի կարելի շատ հանքավայրեր շահագործել, ուստի, բնապահպանի կարծիքով, դա է պատճառը, որ Հայաստանում շատ են հանքավայրեր:
Նրա համոզմամբ` հանքավայրերի ազատ շահագործման պատճառը նաև այն է, որ հանքավայր շահագործող ընկերությունները չեն վճարում պատճառված վնասի, պոչամբարների, թունավոր նյութերի համար:
«Ինչքան ցանկանում, այնքան աղտոտում են միջավայրը և ոչինչ չեն մուծում, այնինչ այլ երկրներում դա մեծ հարկեր է ենթադրում»,- նկատեց ԻՆգա Զառաֆյանը` շարունակելով, որ Հայաստանում նման գործունեությունը շահագործողներին գերշահույթ է տալիս, դա է նաև պատճառը, որ այս բիզնեսով բոլորը չէ, որ կարողանում են զբաղվել, քանի որ մենաշնորհված է:
Ըստ նրա` այս հարցի կարգավորումը պետք է լինի յուրաքանչյուր երկրի կառավարության հետաքրքրությունների շրջանակում, քանի որ հանքավայրերն աղտոտում են երկրի շրջակա միջավայրը:
