Քանի որ ԲՀԿ-ն չի մասնակցում գործադիր իշխանության ձևավորմանը, բնական է, որ ԲՀԿ ներկայացուցիչները պետք է հրաժարվեին փոխնախարարների և փոխմարզպետների պաշտոններից: Այս մասին «Առաջին լրատվական»-ի հարցին ի պատասխան ասաց քաղաքական և ընտրական տեխնոլոգիաների փորձագետ Արմեն Բադալյանը՝ նկատելով, որ այս փուլում ՀՀԿ-ԲՀԿ հարաբերությունների սրացում չկա, երկու ուժերի միջև պայմանավորվածություն էլ նկատելի չէ:
«Այդ քայլը տրամաբանական էր: ԲՀԿ-ն չմասնակցելով գործադիր իշխանությանը՝ հանդիսանում է ընդդիմություն, իսկ ընդդիմադիր ուժի ներկայացուցիչները չեն կարող լինել գործադիր իշխանության հայեցողական և քաղաքական պաշտոններում: Ինչ վերաբերում է այս երկու ուժերի հարաբերությունների սրացմանը, ապա չեմ կարծում, թե դա հիմա նկատելի է: Օգոստոս ամիսն է, բոլորը գնում են արձակուրդ, սրացման իմաստ չկա, դա ավելորդ ուժերի վատնում կլիներ: Հայաստանի քաղաքական դաշտում սրացում չկա»,- ասաց մասնագետը:
Հարցին, թե արդյոք ՀՀԿ-ի և ԲՀԿ-ի միջև պայմանավորվածություն նկատելի՞ չէ թեկուզ Գյումրիի քաղաքապետի ընտրությունների հարցում և արդյոք ՀՀԿ-ն մտադրություն ունի՞ Գյումրին զիջել ԲՀԿ-ին, Արմեն Բադալյանը պատասխանեց. «Գյումրին արդեն փաստացի զիջված է ԲՀԿ-ին, որովհետև մայիսի 6-ի չակերտավոր ընտրությունների ժամանակ ԲՀԿ-ն Գյումրիում ավելի շատ ձայն հավաքեց, քան ՀՀԿ-ն»:
Ըստ նրա՝ ոչ ոք չի բացառում, որ իշխող ուժը և ընդդիմադիր ուժը կարող են ինչ-որ հարցերում պայմանավորվածության գալ: Բայց հիմա, ըստ Բադալյանի, դրա իմաստը չկա: «Ինչո՞ւ գան պայմանավորվածությունների, որպեսզի ԲՀԿ-ն ՀՀԿ-ին աջակցի՞ նախագահական ընտրությունների ժամանակ: Նախագահական ընտրությունների ժամանակ լրիվ այլ գործոններ են աշխատելու: ՀՀԿ-ի համար բացարձակ նշանակություն չունի՝ ԲՀԿ-ն իրեն կաջակցի նախագահական ընտրությունների ժանանակ, թե ոչ: Ենթադրենք Գյուրմրին հանձնեց ԲՀԿ-ին, դա կարո՞ղ է ազդել ընտրությունների վրա: Չէ՛»,- ասաց նա:
Արմեն Բադալյանի խոսքով՝ կուսակցության վարկանիշը բարձրանում է ոչ թե պայմանավորվածություններով, այլ ուրիշ գործոնով: Օրինակ՝ պետք է հստակ լինի՝ քաղաքական ուժն իր ընտրազանգվածի իրավունքները կպաշտպանի՞, թե ոչ: Նրա խոսքով՝ ԲՀԿ-ն պետք է կողմնորոշվի այս փուլում: Մեկ ամիս էլ կարող է հանգստանալ, բայց դրանից հետո այդ ուժը պետք է կողմնորոշվի շատ հարցերում:
«Եթե չկողմնորոշվեց, ինքը հաստատ պարտություն է կրելու: Այն, ինչ տեղի ունեցավ մայիսի 6-ին, էլ իր հետ չի կրկնվի հաստատ»,- ասաց մասնագետը:
