Լոռու մարզկենտրոն Վանաձորում այս տարի նախատեսվում է նոր շենք կառուցել` աղետի հետևանքով անօթևան մնացած մի քանի ընտանիքների համար: Բնակելի շենքի շինարարության, գումարային հատկացումների, շինհրապարակի տարածքի ընտրության ու երկրաբանական որոշ այլ հարցեր դեռևս քննարկման փուլում են, և շենքի կառուցման վերջնական նախագիծը պարզ կդառնա 2 օրից:
Վանաձորի քաղաքապետարանի ճարտարապետության և քաղաքաշինության բաժնի պետի տեղակալ Արշավիր Ղուկասյանը «Առաջին լրատվական»- ի թղթակցի հետ զրույցում նշեց, որ շինարարարությունն իրականացվելու է «Գլենդել Հիլզ» ընկերության կողմից ու վերջինիս ֆինանսավորմամբ.
«Շենքը 4 հարկանի է լինելու, առաջին նախնական քննարկմամբ կունենա 22 բնակելի տուն, այսինքն՝ փաստացի 22 անօթևան ընտանիք շուտով իր բնակարանը կունենա»,- ասաց նա: Ըստ Արշավիր Ղուկասյանի՝ բնակելի տների սենյակների քանակի ու շինարարական այլ հարցերի մասին խոսելու համար դեռևս վաղ է, բայց մեկ շաբաթ անց կառուցվելիք բնակելի շենքի մասին բոլոր տվյալներն ու հստակ ժամկետները պատրաստ կլինեն:
Ճարտարապետության և քաղաքաշինության բաժնի պետի տեղակալը նշեց նաև, որ ամենայն հավանականությամբ, շինարարությունը կսկվի այս տարվա աշնանը:
Հավելենք, որ Վանաձորում այս պահին տնակներում բնակվող շուրջ 800 անօթևան ընտանքիք կա, որոնցից բացի, ըստ քաղաքապետարանի համատիրությունների և բնակարանային տնտեսությունների բաժնի պետ Գրիշա Պառավյանի՝ ևս 270 ընտանիք է ապրում Վանաձորի Բուլղարական թաղամասում, սակայն նրանք, ի տարբերություն նշված 800 ընտանիքի, ունեն նոր տնակային համալիրների սեփականության վկայական ստանալու իրավունք:
Շուշաննա Գրիգորյան, Լոռու մարզային թղթակից
