Ադրբեջանական Defence.az կայքի փոխանցմամբ՝ ՄԱԿ-ի գլխավոր քարտուղար Պան Գի Մունի` «Սովորական սպառազինությունների վերահսկումը տարածաշրջանային ու ենթատարածաշրջանային մակարդակներում» փաստաթղթում ներկայացված է Հարավային Կովկասում սպառազինության ներկայիս իրավիճակը:
Փաստաթղթում մասնավորապես նշված է, որ Եվրոպայում սովորական սպառազինության արմատական դերն ու պայմանագրի նշանակությունը հատկապես աճել են Հարավային Կովկասում, ուր Ադրբեջանը սկսել է սպառազինությունների վտանգավոր մրցավազք:
Եվրոպայում սովորական սպառազինության պայմանագրի իրագործման մասին պաշտոնական տեղեկատվության մեջ նշված է, որ Ադրբեջանը գերազանցել է պայմանագրով նախատեսված սահմանափակումները, որոնք առնչվում են երեք զինատեսակների: Ներկայումս Ադրբեջանն ունի 381 տանկ (թույլատրված քանակը կազմում է 220), 518 հրետանային համակարգ (թույլատրված քանակը կազմում է 285) և 287 զրահամեքենա (թույլատրված քանակը կազմում է 220):
Զեկույցում նաև նշված է, որ նախորդ տարի Ադրբեջանն իր հրետանային զինատեսակների քանակն ավելացրել է 47 միավորով, հարվածային ուղղաթիռները՝ 2 միավորով, իսկ զրահամեքենաները՝ 106 միավորով: Վերջին տարիներին զգալիորեն աճել է Ադրբեջանի ռազմական բյուջեն: Այս տարի Ադբեջանի ռազմական ծախսերին հատկացվել է 3.47 միլիարդ դոլար: